“Ўзбекзаргарсаноати” уюшмаси ва Малайзиянинг Rafahia Holdings Berhad компанияси раҳбарияти ўртасида онлайн учрашув ташкил этилди. Бу ҳақда “Дунё” агентлиги хабар берди.
Мулоқот аввалида Малайзия томонига “Ўзбекзаргарсаноати” уюшмаси ва унинг таркибидаги корхоналар, мамлакатда заргарлик маҳсулотлари ишлаб чиқариш, уларни экспорт қилиш тартиби, соҳани янада ривожлантириш бўйича қабул қилинган қарор ва фармонлар ҳақида батафсил маълумот берилган.
Шунингдек, томонлар заргарлик маҳсулотларини Ўзбекистондан экспорт қилишда божхона божлари, транспорт логистика хизматлари, заргарлик бўйича қўшма инвестиция лойиҳаларини амалга ошириш имкониятларини муҳокама қилган
Малайзия томони заргарлик маҳсулотларини харид қилишда “Ўзбекзаргарсаноати” уюшмаси ва унинг таркибидаги корхоналар билан ҳамкорлик қилишдан манфаатдорлигини билдирган.
Бўлиб ўтган самарали музокалар натижасида Rafahia Holdings Berhad компанияси раҳбариятининг Ўзбекистонга ишчи сафарини ташкил этиш ва ташриф давомида заргарлик корхоналари фаолияти билан танишиш, заргарлик маҳсулотлари ишлаб чиқариш лойиҳасини амалга ошириш имкониятларини ўрганиш бўйича учрашувлар ўтказиш бўйича келишиб олинган.
Rafahia Holdings Berhad компанияси 2011 йилда ташкил этилган бўлиб, заргарлик маҳсулотлари савдоси билан шуғулланади. Шунингдек, компания туризм, авиация ва қишлоқ хўжалиги йўналишларида ҳам фаолият юритади.
Президентнинг апрель ойидаги қарорига асосан Ўзбекистонда заргарлик иши йўналиши бўйича махсус ўқув курсларини муваффақиятли тугатиб, сертификат олган шахсларга заргарлик буюмлари ишлаб чиқариш учун зарур бўлган жиҳозлар ва асбоб-ускуналар сотиб олиш учун 50 миллион сўмгача гаровсиз кредитлар берилиши йўлга қўйилган.
Изоҳ (0)