Қашқадарё вилоятининг туристик зонаси ҳисобланган Китоб туманида хитойлик мутахассислар қураётган осма дор йўл салкам 2 километрга етиши, кўприк қурилишига тахминан 15 миллион доллар сафрланиши маълум бўлди. Бу ҳақда “Дарё”га вилоят ҳокимлиги ахборот хизмати раҳбари Аҳрор Содиқов хабар берди.
Таъкидланишича, 2023 йилнинг 17 май куни Қашқадарё вилояти ҳокими Муроджон Азимов Хитой Халқ Республикасининг China CAMC Engineering Co., LTD компанияси Бош директори билан онлайн мулоқот ўтказган.
Аҳрор Содиқовга кўра, учрашувда Китоб туманининг “Қайнар” туризм маҳалласида Хитой тажрибаси асосида йилига 200 минг маҳаллий ва хорижий сайёҳларга хизмат кўрсатадиган замонавий туристик комплекс қурилишига келишиб олинган.
“Туристик комплексга туташ ҳудудда соатига 800 нафар йўловчига хизмат кўрсатадиган, узунлиги 1,9 километр ва дастлабки ҳисоб-китобларга кўра қиймати 15 миллион доллар бўлган замонавий осма дор йўли қуришга келишилди. Ҳозирда хитойлик мутахассислар томонидан ҳар иккала лойиҳанинг техник-иқтисодий асослари ишлаб чиқилди, осма дор йўли қуриш лойиҳаси 2024 йилнинг иккинчи чорагига қадар тўлиқ якунланади”, — дейди Аҳрор Содиқов.
Қўшимча қилинишича, шунингдек, вилоятда хитойлик ҳамкорлар ёрдамида 20 га яқин умумий ҳажми 500 мвт дан ортиқ бўлган қуёш фото-электр станциялари, мини ГЭСлар ва шамол электр станциялари қурилади.
“‘Яшил шаҳар’ концепцияси доирасида Қарши шаҳрига дастлабки босқичда 50 та электробус етказиб бериш, Хитойнинг сув тежовчи технологиялар ишлаб чиқариш бўйича етакчи компанияларининг маҳсулотларини вилоятга етказиб бериш ва иккинчи босқичда йил якунига қадар, Қарши шаҳридаги эркин иқтисодий зонада уларни ишлаб чиқаришни йўлга қўйишга келишиб олинди”, — дейди масъул.
Тадбирда вилоят ҳокимлиги ва Хитой компанияси ўртасида ўзаро ҳамкорликни ривожлантириш бўйича 10 мвт ҳажмдаги қуёш панеллари ва инверторларини етказиб беришга мўлжалланган икки томонлама битим имзоланган.
“Вилоят ҳокими ва мазкур компания Бош директори бошчилигидаги вакиллар билан 2022 йил 10 ноябрь ва жорий йилнинг 16 январь куни ҳам видеоконференсалоқа форматида учрашувлар ўтказилган эди. Шундан сўнг, компания томонидан 5 мвт ҳажмдаги қуёш панеллари ва инверторларини етказиб берилди. Жорий йилнинг 12–13 март ва 6–7 апрель кунлари хитойлик мутахассислар томонидан Китоб ва Шаҳрисабз туманларида туристик комплекс ва осма дор йўли қуриш жойлари аниқланганди”, — дейди Аҳрор Содиқов.
Изоҳ (0)