Европа Чемпионлар Лигаси ярим финалидан ўрин олган “Манчестер Сити”—“Реал Мадрид” учрашувидан (4:0) кейин икки жамоа мураббийи ўз фикрларини билдирди.
“Реал Мадрид” мураббийи Карло Анчелотти рақиб ғалабага лойиқлиги, бундай мағлубиятга учраш оғриқли экани ва ўйиндан кейин Пеп Гвардиолани табриклагани ҳақида гапирди.
“Рақиб яхшироқ ўйнади ва ғалаба қозонишга лойиқ эди. Улар ўйин бошида бизга жиддий босим ўтказди ва бу иш берди. Ҳужумларни бошлашда қийналдик, улар эса ҳисобда олдинга чиқиб олди. Бундан кейин ўйинга қайтиб олишга қийналдик. Иккинчи таймда ҳам ҳаракат қилдик, лекин ўхшамади.
Ҳозир ўйинга баҳо беришдан маъно йўқ. Бундай мағлубиятга учраш оғриқли. Жуда ҳам оғриқли, лекин бундай ҳолатлар ҳам юз беради.
Чемпионлар Лигаси ярим финалига чиқасиз, кучли рақибга дуч келасиз, ўйинда мағлуб бўласиз ва финалсиз қоласиз. Ҳечқиси йўқ, бундан хулоса чиқариш ва кейинги мусобақада яхшироқ иштирок этиш керак.
Ўйиндан кейин Гвардиолани табрикладим. Чунки унинг жамоаси яхши ўйнади. Ўтган мавсумда уларни мағлуб этгандик, бу мавсумда эса унинг навбати келди. Футбол шундай тузилган — баъзида мағлубиятга ҳам учрайсиз”, — деди Карло Анчелотти.
“Манчестер Сити” мураббийи Пеп Гвардиола бундай устунликни кутмагани, бир йил олдинги ўйин ва требл қилиш имконияти ҳақида фикр билдирди.
“Бу қадар устунлик қилишимизни кутмагандим. Бир йил олдинги оғриқли ҳиссиёт билан ўйнадик. Жуда шиддатли ва интенсив ҳаракат қилдик. Аввалги ўйинда инсайд ўйинчини орқароққа жойлаштиргандим, бу ўйинда эса юқорироқ қўйдим. Кўпроқ бўш зоналар топа олдик ва мослашувчан ҳаракат қилдик. Биз жуда яхши ўйнадик.
Кроос айтганидек, бир йил аввалги ўйинда олтита ёки еттита гол урганимизда, кейинги воқеалар бўлмасди. Лекин “Бернабеу” бу — “Бернабеу”. Уйда биз ҳам ўз кучимизни ҳис қиламиз, бу ерда “Арсенал”, “Реал” ва “Бавария”ни енгдик. Ўтган йилда Куртуа нималар қилгани ҳақида ўйладим. “Олтин тўп” Бенземага берилди, лекин Куртуа ҳам бу совринга ҳақли эди.
Орадан бир йил ўтиб Чемпионлар Лигаси финалига чиқдик. Агар таслим бўлмасанг, футбол ва ҳаёт доим имкон беради.
Треблга яқинмиз ва футболчилар ҳам бу ҳақда ўйлаши мумкин. Треблдан учта ғалаба узоқдамиз. Ҳар бир турнирда биттадан ўйинни ютишимиз керак. Бунга қодирмиз. АПЛда яна бир ўйинда ғалаба қозонишимиз керак, кейин эса Англия Кубогида қўшниларимиз (“Манчестер Юнайтед”) билан ўйин кутиб турибди. Чемпионлар Лигаси финалида эса италян клубига қарши майдонга тушамиз. Чемпионлар Лигаси финалида ўйнаш қанчалик ёқимли эканини сўз билан таърифлаб бўлмайди. Бундан завқ олмоқчимиз”, — деди Пеп Гвардиола.
Изоҳ (0)