Икки “титан” ўртасида унутилмас трилогия. Артуро Гатти ва Микки Уорд қарама-қаршилиги ҳақида (видео)

Афсонавий жангчилар Артуро Гатти ва Микки Уорд бокс тарихидаги унутилмас трилогиялардан бирида иштирок этган. Улар ўртасидаги баҳсларнинг биринчиси кўплаб экспертлар томонидан “Аср жанги” дея эътироф этилган. Қуйида ушбу жанглар ҳақида сўз боради.

Бошқа спорт турларидан фарқли ўлароқ, бокс мухлислари бир шаҳар ёки туман учун маълум жамоа ёки боксчига мухлислик қилмайди. Мухлислар асосан боксчиларнинг рингда кўрсатадиган санъати, маҳорат ва агрессиясига қараб қўллаб-қувватлайди. Айнан шунинг учун Артуро Гатти каби боксчилар бутун дунёда севимли ҳисобланади.

Артуро Гатти шунчаки рингдаги энг жасур жангчи эмасди. Тўғри, у асосан ҳаяжонли, қизиқарли ва мухлисларга ёқувчи жанглари билан машҳур эди. Шу билан бирга, у жуда истеъдодли боксчи бўлган. Бу Гаттининг Микки Уордга қарши трилогиясида аниқ кўринган. Артурога фақатгина жасурлиги, қатъияти ва чидамлилиги учун эмас, балки ҳалоллиги ва мағлубиятни тўғри қабул қила олиши учун ҳам бутун дунёдан мухлислик қилишган.

Гатти Италияда туғилган ва ўсмирлик даврини Канаданинг Монреаль шаҳрида ўтказган. У жуда кучли зарбаси сабабли “момақалдироқ” лақабини олган. Артуро Нью-Йорк шаҳрида ва ўзининг севимли Ню-Жерси штатида ҳам жуда тез машҳурликка эришди. У 1995 йилда супер енгил вазн тоифасида IBF чемпионига айланган. Икки вазн тоифасида ғолиб бўлганига қарамай, Гаттининг фаолияти чемпионлик камарлари ёки жаҳон чемпионлиги билан эмас, балки 4 марта қўлга киритган “Ring Magazine” журнали соврини билан белгиланган.

“Ирландиялик” лақабли Микки Уорд камтарин дунёқарашга эга кучли жангчи эди. Боксчи АҚШнинг Массачусец штати Лоуэлл шаҳрида туғилган. Жангчи 1985 йилда профессионал боксчига айланган, унгача эса уч карра “Янги Англия олтин қўлқоплари” чемпионига айланган. У профессионал боксчи сифатидаги илк йилида 14 та жангда ғалаба қозонган ва бирор марта ҳам мағлуб бўлмаган. Уорд 1990 йилда қаторасига тўрт жангда мағлуб бўлди ва танаффус олишга қарор қилди. Орадан бир неча йил ўтиб, унинг ўгай акаси ва мураббийи Дики Эклунд боксчини спортга қайтишга кўндирди.

Уорд боксга қайтганидан кейин ҳам муваффақият қозонишда давом этди. У чемпионат жангларида ғалаба қозонди ва 2000 йилда ярим ўрта вазнда WBU чемпионига айланди. Эммануэл Бертонга қарши 10 раундлик баҳс The Ring журнали томонидан “Йил жанги” деб топилди.

Микки Уорд фаолияти давомида 13 марта мағлубиятга учраганига қарамай, бирор марта ҳам нокаутга учрамаган. Шу сабабли мухлислар ҳурмат қиладиган спортчига айланган. 18 йиллик фаолияти давомида Микки улкан промоутерлик компаниялари билан ҳамкорлик қилмаган. У билан бирга ишлаган ва ёрдам берган одамлар бўлган, лекин у ҳеч қачон катта пул кўрмаган.

2002 йилнинг 18 май санасида Микки Уорд ва Артуро Гатти биринчи марта рингда тўқнаш келди ва бу унутилмас трилогиянинг бошланиши эди. Икки жангчи ўртасидаги ўн раунддан иборат баҳс шунчалик буюкки, кўплаб экспертлар уни “аср жанги” деб атайди. Тўққизинчи раунд жуда ҳам қизиқарли бўлди ва шарҳловчи Эмануэл Стюард буни “Аср раунди” деб атади. Микки ҳакамлар қарорига кўра ғалаба қозонди. Баҳс натижадан кўра жангнинг ўзи каттароқ аҳамиятга эга эканини кўрсатувчи белги бўлди ва реваншга бўлган талабни ошириб юборди.

Ярим йилдан сўнг улар яна рингда тўқнаш келди. Жангчилар бу сафар миллион долларлик гонорар учун жанг қилиши керак эди. Иккинчи баҳс аввалгиси каби бўлмади. Чунки учинчи раундда Уорднинг қулоқ пардаси тешилди ва жанг бир томонлама ўтиб, Гаттининг ғалабаси билан тугади. Қарама-қаршиликни якунлаш учун учинчи жанг ўтказилиши маълум бўлди.

Учинчи ҳал қилувчи баҳс яна “Йил жанги” номига даъвогарлик қилди. Унда Артуро Гатти ҳакамларнинг якдил қарорига кўра ғалаба қозонди ва трилогияни ўз фойдасига ҳал қилди.

Бироқ Гатти ва Уорд ўртасидаги қарама-қаршилик ринг чегараларидан анча узоққа чиқиб кетди. Уорд трилогиядан умумий ҳисобда 3 миллион доллар ишлади ва учинчи жангдан кейин фаолиятини якунлади. Унинг ҳаёти ҳақида 2010 йилда “Жангчи” номли фильм ишланган ва “Оскар” мукофотини қўлга киритган.

Биринчи учрашувидан кейинги 13 ой ичида Гатти ва Уорд нотанишдан рақибга, кейинроқ эса дўстларга айланди. Артуро фаолиятини 2007 йилгача давом эттирди. Карьерасининг сўнгида унга дўсти ва собиқ рақиби бўлган Микки Уорд мураббийлик қилди.

2009 йилнинг 11 июль санасида Гатти Бразилиядаги меҳмонхоналарнинг бирида ўлик ҳолда топилди. Тергов ўз жонига қасд қилиш деган хулосага келди, бироқ унинг оиласи ва дўстлари қотиллик деб ҳисоблади. Гатти вафотидан кейин 2013 йилда Халқаро бокс шон-шуҳрат залига киритилди.

2013 йилнинг октябрь ойида HBO компанияси “Афсонавий оқшомлар: Гатти—Уорд ҳақида ҳикоя” номли ҳужжатли фильм ишлади. Режиссёр Марк Уолберг томонидан суратга олинган ҳужжатли фильм Артуро Гатти ва Микки Уорд ўртасидаги трилогияга назар ташлайди ва икки жангчи ўртасидаги муносабатларни акс эттиради.