Afsonaviy jangchilar Arturo Gatti va Mikki Uord boks tarixidagi unutilmas trilogiyalardan birida ishtirok etgan. Ular o‘rtasidagi bahslarning birinchisi ko‘plab ekspertlar tomonidan “Asr jangi” deya e’tirof etilgan. Quyida ushbu janglar haqida so‘z boradi.
Boshqa sport turlaridan farqli o‘laroq, boks muxlislari bir shahar yoki tuman uchun ma’lum jamoa yoki bokschiga muxlislik qilmaydi. Muxlislar asosan bokschilarning ringda ko‘rsatadigan san’ati, mahorat va agressiyasiga qarab qo‘llab-quvvatlaydi. Aynan shuning uchun Arturo Gatti kabi bokschilar butun dunyoda sevimli hisoblanadi.
Arturo Gatti shunchaki ringdagi eng jasur jangchi emasdi. To‘g‘ri, u asosan hayajonli, qiziqarli va muxlislarga yoquvchi janglari bilan mashhur edi. Shu bilan birga, u juda iste’dodli bokschi bo‘lgan. Bu Gattining Mikki Uordga qarshi trilogiyasida aniq ko‘ringan. Arturoga faqatgina jasurligi, qat’iyati va chidamliligi uchun emas, balki halolligi va mag‘lubiyatni to‘g‘ri qabul qila olishi uchun ham butun dunyodan muxlislik qilishgan.
Gatti Italiyada tug‘ilgan va o‘smirlik davrini Kanadaning Monreal shahrida o‘tkazgan. U juda kuchli zarbasi sababli “momaqaldiroq” laqabini olgan. Arturo Nyu-York shahrida va o‘zining sevimli Nyu-Jersi shtatida ham juda tez mashhurlikka erishdi. U 1995-yilda super yengil vazn toifasida IBF chempioniga aylangan. Ikki vazn toifasida g‘olib bo‘lganiga qaramay, Gattining faoliyati chempionlik kamarlari yoki jahon chempionligi bilan emas, balki 4 marta qo‘lga kiritgan “Ring Magazine” jurnali sovrini bilan belgilangan.
“Irlandiyalik” laqabli Mikki Uord kamtarin dunyoqarashga ega kuchli jangchi edi. Bokschi AQSHning Massachusets shtati Louell shahrida tug‘ilgan. Jangchi 1985-yilda professional bokschiga aylangan, ungacha esa uch karra “Yangi Angliya oltin qo‘lqoplari” chempioniga aylangan. U professional bokschi sifatidagi ilk yilida 14 ta jangda g‘alaba qozongan va biror marta ham mag‘lub bo‘lmagan. Uord 1990-yilda qatorasiga to‘rt jangda mag‘lub bo‘ldi va tanaffus olishga qaror qildi. Oradan bir necha yil o‘tib, uning o‘gay akasi va murabbiyi Diki Eklund bokschini sportga qaytishga ko‘ndirdi.
Uord boksga qaytganidan keyin ham muvaffaqiyat qozonishda davom etdi. U chempionat janglarida g‘alaba qozondi va 2000-yilda yarim o‘rta vaznda WBU chempioniga aylandi. Emmanuel Bertonga qarshi 10 raundlik bahs The Ring jurnali tomonidan “Yil jangi” deb topildi.
Mikki Uord faoliyati davomida 13 marta mag‘lubiyatga uchraganiga qaramay, biror marta ham nokautga uchramagan. Shu sababli muxlislar hurmat qiladigan sportchiga aylangan. 18 yillik faoliyati davomida Mikki ulkan promouterlik kompaniyalari bilan hamkorlik qilmagan. U bilan birga ishlagan va yordam bergan odamlar bo‘lgan, lekin u hech qachon katta pul ko‘rmagan.
2002-yilning 18-may sanasida Mikki Uord va Arturo Gatti birinchi marta ringda to‘qnash keldi va bu unutilmas trilogiyaning boshlanishi edi. Ikki jangchi o‘rtasidagi o‘n raunddan iborat bahs shunchalik buyukki, ko‘plab ekspertlar uni “asr jangi” deb ataydi. To‘qqizinchi raund juda ham qiziqarli bo‘ldi va sharhlovchi Emanuel Styuard buni “Asr raundi” deb atadi. Mikki hakamlar qaroriga ko‘ra g‘alaba qozondi. Bahs natijadan ko‘ra jangning o‘zi kattaroq ahamiyatga ega ekanini ko‘rsatuvchi belgi bo‘ldi va revanshga bo‘lgan talabni oshirib yubordi.
Yarim yildan so‘ng ular yana ringda to‘qnash keldi. Jangchilar bu safar million dollarlik gonorar uchun jang qilishi kerak edi. Ikkinchi bahs avvalgisi kabi bo‘lmadi. Chunki uchinchi raundda Uordning quloq pardasi teshildi va jang bir tomonlama o‘tib, Gattining g‘alabasi bilan tugadi. Qarama-qarshilikni yakunlash uchun uchinchi jang o‘tkazilishi ma’lum bo‘ldi.
Uchinchi hal qiluvchi bahs yana “Yil jangi” nomiga da’vogarlik qildi. Unda Arturo Gatti hakamlarning yakdil qaroriga ko‘ra g‘alaba qozondi va trilogiyani o‘z foydasiga hal qildi.
Biroq Gatti va Uord o‘rtasidagi qarama-qarshilik ring chegaralaridan ancha uzoqqa chiqib ketdi. Uord trilogiyadan umumiy hisobda 3 million dollar ishladi va uchinchi jangdan keyin faoliyatini yakunladi. Uning hayoti haqida 2010-yilda “Jangchi” nomli film ishlangan va “Oskar” mukofotini qo‘lga kiritgan.
Birinchi uchrashuvidan keyingi 13 oy ichida Gatti va Uord notanishdan raqibga, keyinroq esa do‘stlarga aylandi. Arturo faoliyatini 2007-yilgacha davom ettirdi. Karyerasining so‘ngida unga do‘sti va sobiq raqibi bo‘lgan Mikki Uord murabbiylik qildi.
2009-yilning 11-iyul sanasida Gatti Braziliyadagi mehmonxonalarning birida o‘lik holda topildi. Tergov o‘z joniga qasd qilish degan xulosaga keldi, biroq uning oilasi va do‘stlari qotillik deb hisobladi. Gatti vafotidan keyin 2013-yilda Xalqaro boks shon-shuhrat zaliga kiritildi.
2013-yilning oktabr oyida HBO kompaniyasi “Afsonaviy oqshomlar: Gatti—Uord haqida hikoya” nomli hujjatli film ishladi. Rejissor Mark Uolberg tomonidan suratga olingan hujjatli film Arturo Gatti va Mikki Uord o‘rtasidagi trilogiyaga nazar tashlaydi va ikki jangchi o‘rtasidagi munosabatlarni aks ettiradi.
Izoh (0)