ХХ аср охири ва XXI аср бошларининг энг ёрқин боксчиларидан бири бўлган Артуро Гатти 15 апрель санасида туғилган. Асли келиб чиқиши итальян бўлган канадалик агар ҳаёт бўлганида 2022 йилда 50 ёшни қарши оларди. Аммо боксчи бундан 13 йил аввал, 2009 йилда жумбоқли тарзда вафот этган. Икки вазн тоифасида жаҳон чемпиони фаолияти давомида жуда кўплаб жанглар ўтказган, шулардан тўрттаси эса ўз вақтида «йил жанги» деб топилган. «Чақмоқ» (Гаттининг лақаби шундай) таваллуд топган сана муносабати билан қуйида ана шу ва бошқа жанглар ҳақида сўз юритилади.
Артуро Гатти — Габриэль Руэлас
- Жанг санаси: 1997 йил 4 октябрь;
- Жанг мақоми: Гатти иккинчи енгил вазн тоифасида (59 кг гача) учинчи марта IBF камарини ҳимоя қилади;
- Боксчиларнинг жанг вақтидаги рекордлари: Гаттти —28 ғалаба, 1 мағлубият, Руэлас — 44 ғалаба, 3 мағлубият;
- Жанг натижаси: Гатти бешинчи раундда техник нокаут эвазига ғалаба қозонади;
- Мукофотлар: Ring журналига кўра, йилнинг энг яхши жанги ва энг яхши нокаути деб топилади.
1997 йилнинг 4 октябрида иккинчи ярим енгил вазн тоифасида IBF камари соҳиби Артуро Гатти ва мексикалик Габриэль Руэлас ўртасида жанг бўлиб ўтади. Биринчи раунддан бошлаб кураш қизғин тус олади. Руэлас тоза жанг қилмайди ва белдан пастга зарба бергани учун икки марта огоҳлантирилади. Тўртинчи раундга келиб, боксчилар кучли зарбалар билан алмашади. Руэлас оверҳендни ўтказиб юборса ҳам, кучли апперкот билан жавоб қайтаришнинг уддасидан чиқади.
Бешинчи раундда зарбаларнинг деярли ярми апперкотлар ҳиссасига тўғри келади. Боксчилар том маънода бир-бири билан пешона уриштиради, зарбалар алмашинуви давом этади. Бошида Руэлас аниқроқ ҳаракат қилган бўлса, кейинроқ Гатти мексикаликнинг жигарига бир неча бор мушт тушириб, вазиятни ўзгартирди. Шу тариқа Руэлас ўнг қўлини пастга туширишга мажбур бўлади, Артуро эса бундан фойдаланиб қолиб, рақибининг тумшуғига зарбалар комбинациясини йўллайди, бу эса ўз навбатида нокаутга олиб келади.
Артуро Гатти – Трейси Паттерсон
- Жанг санаси: 1995 йил 15 декабрь;
- Жанг мақоми: Паттерсон иккинчи ярим енгил вазн тоифасида (59 кг) 1 марта IBF чемпионлик камарини ҳимоя қилади
- Боксчиларнинг жанг вақтидаги рекордлари: Гатти — 23 ғалаба, 1 мағлубият, Паттерсон — 53 ғалаба, 3 мағлубият.
- Жанг натижаси: Гатти ҳакамларнинг якдил қарори билан ғалаба қозонади.
Бу Артуро Гатти учун фаолиятидаги биринчи чемпионлик жанги бўлади. У Флойд Паттерсоннинг асраб олинган ўғли Трейси Паттерсонга қарши рингга кўтарилади.
Жанг канадалик боксчи учун ниҳоятда оғир кечади. У узоқ масофадан ҳаракат қилишга уринади, Паттерсон эса зарбалар учун қулай вазият пойлайди. Иккинчи раундда даъвогар чемпионни қулатади, аммо Паттерсон ўрнидан туради, жанг охиригача ташаббус қўлдан қўлга ўтиб туради.
12 раундлик жанг якунида ҳакамлар устунликни Паттерсон эмас, балки фаолиятида илк бор жаҳон чемпиони бўлган Гаттининг фойдасига беради.
Артуро Гатти — Микки Уорд (2-жанг)
- Жанг санаси: 2002 йил 23 ноябрь;
- Жанг мақоми: рейтинг жанги;
- Боксчиларнинг жанг вақтидаги рекордлари: Гатти — 34 ғалаба, 6 мағлубият, Уорд — 38 ғалаба, 11 мағлубият;
- Жанг натижаси: Гатти ҳакамларнинг якдил қарори билан ғалаба қозонади.
Биринчи жангдаги баҳсли натижадан (Микки очколар эвазига ғалаба қозонади) сўнг, боксчилар ўша йилнинг ўзидаёқ реванш ўтказишга келишиб олади. Беллашув Ring журнали талқинига кўра йилнинг энг яхши жанги ва раунди (тўққизинчи) учун мукофотларни олган биринчи тўқнашувга нисбатан оддийроқ тус олади.
Артуро бутун жанг давомида усталик билан ҳаракат қилиб, Уордни ўзига яқинлаштирмайди ва деярли барча раундларни ўз фойдасига ҳал қилади. Учинчи раундда канадалик Уордни йиқитиб, унинг қулоқ пардасига зарар етказишга ҳам муваффақ бўлади.
Ўз навбатида Гатти ҳам жароҳатларсиз қолмайди, беллашувнинг иккинчи ярмида қўлини жароҳатлаб олади.
Артуро Гатти — Микки Уорд (3-жанг)
- Жанг санаси: 2003 йил 7 июль;
- Жанг мақоми: рейтинг жанги;
- Боксчиларнинг жанг вақтидаги рекордлари: Гатти — 35 ғалаба, 6 мағлубият, Уорд — 38 ғалаба, 12 мағлубият;
- Жанг натижаси: Гатти ҳакамларнинг якдил қарори билан ғалаба қозонади;
- Мукофотлар: Ring журналига кўра йилнинг энг яхши жанги.
Ушбу жангдан олдин Гатти олийжаноблик кўрсатади. У ўз вакилларига Уорд хоҳлаган гонорарга рози бўлишини айтади. Артуро қўлқопларини михга илмоқчи бўлган Микки билан дўстлигини жуда қадрларди. Натижада Уорд фаолиятидаги энг катта гонорарга эга чиқди — уч миллион доллар.
Тўқнашувнинг ўзи иккинчисига жуда ўхшаш тарзда ривож олди. Аммо бу сафар Гатти учинчи раундга келиб, ўнг қўлини синдириб олди, тўртинчи раунддан то жанг охиригача фақат чап қўли билан бокс тушади. Уорд ҳатто олтинчи раундда рақибини нокдаунга туширишга ҳам муваффақ бўлганди, аммо бу ғалаба қозониш учун етарли бўлмайди.
Тоза жеблар ва ўз вақтида йўлланган ён тарафлама зарбалар Гаттининг ушбу жангда ҳам, трилогияда ҳам ғалаба қозонишига замин яратади.
Артуро Гатти — Томас Дамгаард
- Жанг санаси: 2006 йил 28 январь;
- Жанг мақоми: иккинчи ярим ўрта вазн тоифасида (66,7 кг гача) вакант қолган IBF чемпионлик камари учун
- Боксчиларнинг жанг вақтидаги рекордлари: Гатти — 39 ғалаба, 7 мағлубият, Дамгаард — 37 ғалаба, бирор марта ҳам мағлубиятга учрамаган;
- Жанг натижаси: Гатти 11-раундда техник нокаут эвазига ғалаба қозонади.
Агар қуйида сўз борадиган уч жиҳат ҳақида гап бормаса, Гаттининг бу ғалабаси ҳам аввалгиларидан унчалик фарқ қилмайди.
Бу Артуронинг спорт фаолиятидаги сўнгги ғалабаси бўлиб, у бир йил ўтиб, икки оғир мағлубиятдан сўнг ринг билан хайрлашади.
Унга даниялик енгилмас Томас Дамгаард рақиблик қилади, у жангга 37 та ғалаба билан келган эди.
Бу Гаттининг иккинчи ярим ўрта вазн тоифасидаги иккинчи жанги бўлади. Артуро учун ғайриоддий вазн тоифасига биринчи юриш 2001 йилда Оскар де ла Ҳоядан бешинчи раунддаги оғир мағлубият билан якунланганди.
Албатта, Дамгаард бу вазн тоифаси етакчилари учун унчалик жиддий рақиб эмасди, ҳатто калтакланган ва чарчаган Гатти ҳам тезлик ва техника бўйича рақибига нисбатан катта устунликка эга бўлган. Бироқ даниялик характер кўрсатиб, рақибига яхши қаршилик кўрсатди ва унга бир нечта муносиб зарбалар ҳам берди.
Аммо айнан Гаттининг зарбалари жанг натижасини ҳал қилиб берди. 11-раундга киришдан олдин данияликнинг юзида, «онажон, мени бу ердан олиб кетинг», деган жумлаларни ўқиш қийинчилик туғдирмасди. Ва ҳақиқатан ҳам уни олиб кетишса ёмон бўлмасди. Толиққан боксчи раунд бошида ҳакамнинг буйруқларига эътибор бермай, қоидани ҳам бузди. Раунднинг иккинчи ярмида эса Гатти уни ўнг томондан кучли зарбалар билан шунчалик «сийладики», сўнгги сонияларда Дамгаард бўрон вақтида кемадаги денгизчидек ринг атрофида гандираклаб юрарди, натижада эса ҳакам тўқнашувни тўхтатишга мажбур бўлади.
Изоҳ (0)