Тошкент шаҳрида Ўзбекистон—Германия форуми бўлиб ўтди. Бу ҳақда Uzbekistan Airports ахборот хизмати хабар берди.
Германиядан келган туроператор ва у оммавий ахборот воситалари делегацияси учун Ўзбекистон Туризм ва маданий мерос вазирлиги томонидан ўтказилаётган инфотурнинг якуний тадбири бўлиб ўтган.
Биринчи ялпи мажлисда Silk Avia компанияси директорининг бизнесни ривожлантириш бўйича ўринбосари Руслан Нурисламов авиакомпания ва Uzbekistan Airports компанияси вакили сифатида табрик сўзи билан чиқди.
“Бугунги кунда Европа, афсуски, Ўзбекистон аэропортлари орқали ўтувчи ҳаво транспорти йўналишлари умумий ҳажмининг кичик фоизини эгаллайди. Европа шаҳарларига тўғридан тўғри рейсларни фақат Uzbekistan Airways амалга оширади ёки Истанбул орқали транзит ташувни Турк ҳаво йўллари амалга оширади.
Ўзбекистонга йўловчи рейсларини амалга оширувчи ягона Европа компанияси Венгриянинг WizzAir лоукостеридир. Айни пайтда Тошкентдан Европа шаҳарларига ҳафтасига 108 та, Самарқанддан 14 та, Урганчдан 12 та ва Бухородан 4 та рейс амалга оширилмоқда”, — деди Руслан Нурисломов.
Uzbekistan Airports компанияси Ўзбекистон ва Европа, хусусан, Германия шаҳарлари ўртасида ҳаво қатновини ривожлантириш зарурлигига ишонади. Чунки, ўтган йил якунларига кўра, Ўзбекистонга Германиядан энг кўп сайёҳлик гуруҳлари келган. 2022 йилда ушбу мамлакатнинг 17,7 минг фуқароси республикага ташриф буюрди. Иккинчи ўринда — Франция фуқаролари, учинчи ўринда — Буюк Британия.
Шунингдек, форум доирасида туризмни ривожлантириш бўйича қўшма тажриба, икки мамлакат вакилларини қизиқтираётган туризм турлари, хусусан, экскурсия ва экотуризм масалалари муҳокама қилинди ҳамда сайёҳлик оқимлари алмашинуви бўйича ҳамкорлик алоқаларини янада ривожлантиришга келишиб олинди.
Изоҳ (0)