Бир йил аввал “Эконазорат” ахборот тизими жорий этилган эди. Унга кўра, жисмоний шахслар экология, атроф-муҳитни муҳофаза қилиш ва табиатдан фойдаланиш соҳасидаги ҳуқуқбузарлик акс этган фото ва видеоматериалларни тизимга юбориши ва бунинг эвазига рағбатлантирилиши кўзда тутилган.
Юборилган ҳуқуқбузарлик ҳолати тасдиқланса, дарахтлар, буталар, бошқа ўсимликлар ва ниҳолларни қонунга хилоф равишда кесиш, кундаков қилиш, шикастлантириш, йўқ қилиш ёки бошқа жойга кўчириб ўтказиш бўйича — ҳуқуқбузардан ундирилган маблағлар ҳисобидан базавий ҳисоблаш миқдорининг 1 баравари (330 минг сўм) миқдорида рағбатлантирилади.
Экология, атроф-муҳитни муҳофаза қилиш ва табиатдан фойдаланиш соҳасидаги бошқа ҳуқуқбузарлик бўйича — ҳуқуқбузардан ундирилган жариманинг ўн беш фоизи миқдорида пул мукофоти берилади.
Табиат ресурслари вазирлиги ахборот хизмати раҳбари Лола Раҳмонбоеванинг “Дарё”га маълум қилишича, ҳозирга қадар “Эконазорат” ахборот тизими орқали 419 та фото ва видеофактлар келиб тушган. Шундан 166 та ҳолат (фуқаронинг исми, фамилияси, отасининг исми, доимий яшаш манзили, уяли телефон рақами, банк пластик картаси рақами ва электрон манзили, ҳуқуқбузарлик содир этилган жой, сана ва вақт, ҳуқуқбузарлик содир этган шахс тўғрисидаги маълумотлар кўрсатилмаганлиги сабабли) ўз тасдиғини топмаган.
Қўшимча қилинишича, 157 та ҳолат давлат инспекторлари томонидан кўриб чиқилмоқда,
“Тасдиғини топган 21 та ҳолат бўйича маъмурий иш расмийлаштирилган. 17 нафар фуқаро белгиланган тартибда рағбатлантирилган”, — дейилади вазирлик ахборотида.
Вазирлик маълумотида “Эконазорат” ахборот тизимига юборилган хабарлар учун қанча сумма ажратилгани айтилмаган.
Изоҳ (0)