Қашқадарё вилоятининг Қарши шаҳрида ИИБ мансабдори ва шаҳар прокурори телефон орқали мулоқот қилгани, унда ИИБ мансабдори прокурорнинг ноқонуний топшириғини бажаришдан бош тортиб, халқни севишини айтгани хабар берилганди. Кейинчалик Бош прокуратура Қарши шаҳар 4-сонли ИИБ бўлими бошлиғини сохта обрў орттиришга уринишда айблади. Тармоқларда тарқалган аудиоёзувдан маълум бўлишича, шаҳар прокурори тадбиркорга тегишли савдо дўконини суд қарорисиз буздиришга, буни ИИБ ходимлари орқали бажаришга ҳаракат қилган.

Маълум қилинишича, Қарши шаҳар прокурори Алишер Мирзаев телефон орқали суҳбатдоши билан гаплашиб, воқеа жойида нима бўлаётганини сўраган.

“Устига бензин сепди, лекин ёқмади. Тез ёрдам келиб олиб кетди”, — дейди прокурорнинг нима бўлгани билан қизиқишига жавоб берган суҳбатдош.

“Суднинг қарори қачон чиқар экан?”, дейди шаҳар прокурори экани айтилаётган овоз эгаси. Саволга жавоб берган суҳбатдош эса “18-да бўлар экан, хўжайин”, дейди. “Бўлди унда, “отбой’”, дея гапини тугатади масъул.

“Дўкончининг хотини устига бензин сепгани, ИИБ мансабдорининг прокурорга ноқонуний топшириғини бажармайман дегани Бош прокуратура берган маълумотга таянилса, 2023 йилнинг 13 апрель куни бўлиб ўтган. Демак, Қарши шаҳри прокурори 13 апрель куни суд 18 апрелда қандай қарор чиқаришини олдиндан билган бўлиб чиқмоқдами? ИИБ мансабдори бажармайман, деган пайтда суд қарорисиз бунақа ноқонуний топшириқларни бажармайман деганми шунда?”, дея савол беради бу ҳақда жамоатчиликка ахборот тарқатган канал муаллифи.

“Дарё” воқеалар ривожини кузатишда давом этади.