Ички ишлар вазири Пўлат Бобожоновдан қайта ишга тиклашини сўраб, мурожаат қилган собиқ ИИБ ходими ўзига бириктирилган бозор ҳудудидаги савдо дўконларидан исталган маҳсулотини олиб, пулини бермай, бозорчилар эътирозига сабаб бўлгани ва шу сабаб ишдан олингани маълум қилинди. Бу ҳақда Ички ишлар вазирининг Бўка туманидаги “Бўстон” маҳалласида бўлиб ўтган сайёр қабулида сўз борди.
Сайёр қабулга келган собиқ ИИБ ходими А.Б. ва унинг онаси вазир қабулида бўлиб, 2021 йилдан бери ишсиз эканини, ИИБ тизимидан ишдан бўшатилгач, муаммоларга дуч келаётганини билдирди.
Мазкур муаммони тинглаган вазир А.Б.нинг нима сабабдан ишдан олингани билан қизиқди.
Вазирга маълумот берган ИИБ мансабдорларининг айтишича, А.Б. Тошкент вилояти Ички ишлар Бош бошқармаси бошлиғининг 2021 йил 7 майдаги буйруғи билан ишдан бўшатилган.
“Ходим интизомий жазо чораси мавжуд бўлган тақдирда ҳам мунтазам равишда хизмат интизомини бузиб келган. Собиқ ходим Бекобод шаҳар ИИБ жамоат тартибини сақлаш бўлинмаси патрул пост хизмати гуруҳи сафдор ходими бўла туриб, ўзига бириктирилган бозор ҳудудидаги савдо дўконларидан мунтазам равишда ўзи истаган маҳсулотларни олиб, савдогарларга пулини бермай келган. Бу эса савдогарлар эътирозига сабаб бўлган. Шундан сўнг бозор раҳбарияти бу ҳақда шикоят қилган. Шундан сўнг ходим хизмат интизомини бузгани ва бу ҳолат такроран содир этилганини инобатга олиб, ишдан бўшатган”, — дейди вазирга бу ҳақда ахборот берган масъуллар.
Вазир мазкур муаммони тинглаб бўлгач, мурожаатчининг онасига юзланиб, “Ишсиз фуқаронинг муаммоларга, қийинчиликларга дуч келишини биламан ва тушунаман. Аммо жамоат тартибини сақловчи патрул пост ходими жамоатчилик назоратидаги вакил бўлгани учун ҳам бундайин ишларни қилмаслиги, қонунларни бузмаслиги керак. Ҳар қандай ҳолатда ҳам қонунни ҳурмат қилиши лозим”, — деди.
Вазир қабулида бўлган собиқ ИИБ ходимининг муаммоси чуқур ўрганиб чиқилиши, тегишли тартибда жавоб берилиши маълум қилинди.
Изоҳ (0)