Чеченистон раҳбари Рамзан Қодиров Чехияда 2014 йилдан бери санкциялар остида бўлган Зазу айғирини ўғирлаш учун “Украина махсус хизматлари”га 18 минг доллар тўлаганини даъво қилмоқда.
Чеченистон раҳбарининг сўзларига кўра, 2023 йил бошида “Украина махсус хизматларининг вакиллари” ўз воситачилари орқали отни пул эвазига озод қилиш таклифи билан мурожаат қилишган.
“Улар менинг отга бўлган муносабатимни билишарди ва янгилишмади — албатта, мен рози бўлдим. Ростини айтсам, мен Зазу қандайдир тарзда, ундан санкциялар олиб ташланиб ёки шунга ўхшаш йўл билан расмий равишда қайтариб берилади, деб ўйладим. Аммо махсус хизматларнинг мардонавор режаси борлиги маълум бўлди — улар Чехия полицияси билан тил бириктириб, унинг Чехиядаги отхонадан ўғирланишини шунчаки уюштирган”, — деб ёзди Қодиров ўзининг Telegram-каналида.
“Ҳозир Зазу уйга қайтмоқда. Унинг қайтиши менга қимматга тушди: 18 минг доллар! Ҳа, ҳа, ўша пайтда Чехия ҳуқуқ-тартибот идоралари уни айнан шунчага баҳолаган. Унинг ҳақиқий қиймати ва ажойиб наслини ҳисобга олсак, бу шунчаки тийинлар! Шундай экан, дўстлар, агар Европадан бирор нарса олиб келиш керак бўлса, Украина махсус хизматларига мурожаат қилинг. Тез, профессионал, арзон, санкциялар ҳам четлаб ўтилади!”.
2023 йилнинг март ойида Чехия ОАВлари Крабчице қишлоғидаги отхонадан қиймати тахминан 400 минг крон (тахминан 18 минг доллар) бўлган 16 ёшли Зазу лақабли зотдор айғири ўғирлаб кетилгани ҳақида хабар берганди. Шу билан бирга, журналистлар от Рамзан Қодировга тегишли эканини ёзишган. Чеченистон раҳбари уни 2012 йилнинг баҳорида сотиб олиб, Дубайдан Чехияга кўчирган, бироқ икки йилдан сўнг айғир Қодировнинг мулки сифатида Чеченистон раҳбарига нисбатан қўлланилган санкциялар остига тушган.
Отнинг ўғирланиши бўйича Қодиров айтиб берган версияни исботловчи ҳеч қандай далил йўқ.
Изоҳ (0)