The Washington Post нашри “Вагнер” асосчиси Евгений Пригожин Киевга рус армияси жойлашуви ҳақидаги маълумотни бериш эвазига Бахмутни тарк этишни таклиф этгани ҳақида маълумот берди. Украина Мудофаа вазирлигининг Бош разведка бошқармаси мазкур хабарга муносабат билдирди.
Украина разведкаси вакили Андрей Юсов разведканинг россиялик ёлланма аскарлар билан алоқаси ким учун фойдали, деган саволга жавоб берди. У Украина ҳудудларини озод қилиш учун махсус хизматлар турли воситаларга мурожаат қилишини таъкидлади.
“Ўйлайманки, Украина ва махфий хизматлар керак бўлганда бундай нарсаларни муҳокама қилади ва Украинанинг миллий манфаатларидан келиб чиқиб жавоб беради. Шубҳасиз, Украина ўз миллий манфаатларини ҳимоя қилиш учун қўлидан келганини қилмоқда. Агар гап махсус хизматлар ҳақида кетаётган бўлса, бунинг учун турли воситалар қўлланади”, — деди Юсов.
Унинг сўзларига кўра, АҚШ аллақачон The Washington Post нашридаги факт бўйича текширув бошлаган.
“АҚШ Адлия вазирлиги томонидан расмий текширувлар олиб борилаётган бу иш бўйича сиз ва мен изоҳ беришимиз керак деб ўйламайман”, — деди Юсов.
WP: Пригожин Украинага қандай таклиф берди?
The Washington Post Пентагоннинг сиздирилган махфий маълумотларига таяниб, “Вагнер” асосчиси Евгений Пригожин январь ойида Украина Мудофаа вазирлигининг Бош разведкасига ноодатий таклиф берганини ёзди.
Таклифда Украина қўшинларини Бахмутдан олиб чиқиб кетиш эвазига Пригожин Украинага рус қўшинларининг жойлашуви ҳақидаги маълумотларни узатишга ваъда берган. Украинанинг икки амалдори аноним тарзда The Washington Post нашрига Пригожиннинг Украина қуролли кучлари билан “қайта-қайта” суҳбат ўтказганини тасдиқлади. Киев Бахмут ҳақидаги таклифга рози бўлмаган. Манбалардан бирига кўра, бу таклиф бир неча бор илгари сурилган.
Изоҳ (0)