Тошкентга олиб келинган янги автобус ва электробуслар атмосферага чиқариладиган заҳарли газлар миқдорини 1,2 минг тоннага камайтиради. Бу ҳақда Табиат ресурслари вазирлиги ахборот хизмати хабар берди.
Хабарга кўра, 10 апрелдан 10 майга қадар бутун республика бўйлаб “Тоза ҳаво” ойлиги ўтказилмоқда. Бунда транспорт воситаларидан атмосферага заҳарли газлар тарқалишини камайтириш кўзда тутилган. Тошкентга Хитойдан олиб келинган 223 та янги автобус ва электробуслар айнан ҳаводаги заҳарли ташламаларни камайтиришга хизмат қилади. Мазкур жамоат транспорти воситалари экологик жиҳатдан хавфсиз ҳисобланади.
Янги транспорт воситалари пойтахт кўчаларида 1000 дан ортиқ йўналишда ҳаракатланмоқда. Натижада атмосферага чиқариладиган заҳарли газлар миқдори бир йилда ўртача 1,2 минг тоннага камайишига эришилади.
Тошкентда жамоат транспорти
2023 йил 16 февралдаги “Жамоат транспорти тизимини ислоҳ қилиш чора-тадбирлари тўғрисида”ги президент қарорига асосан, Тошкент шаҳри жамоат транспорти учун 200 дона 18 метрли ва 500 дона 12 метрли табиий газда ишлайдиган автобуслар ҳамда 300 дона 12 метрли электробуслар харид қилиш белгиланган.
Хитойнинг Yutong Bus Cо Ltd компанияси ва “Тошшаҳартрансхизмат” ўртасида тузилган шартномага асосан, 2023 йилнинг март ойи якунига қадар Yutong автобусларнинг 1-партияси, яъни 110 дона автобус ва 150 дона электробуслар Ўзбекистонга етказиб берилиши кутилаётгани тўғрисида хабар берилганди.
Давлат раҳбари 13 декабрь куни Учтепа тумани фаоллари билан ўтказилган йиғилишда бош вазирга март ойигача Тошкентга 1000 дона автобус олиб келиш бўйича топшириқ берганини айтганди. “Жамоат транспортини ислоҳ қилишимиз зарур. Ютуқлар билан бирга, камчиликларимиз ҳам жуда кўп”, — деганди президент.
Изоҳ (0)