Нима учун қулупнай фойдали ва кимлар уни истеъмол қилишдан тийилиши керак?

Кўпчилик қулупнайни истеъмол қилиш кераклигини таъкидлайди. Хўш, қулупнайнинг инсон организми учун қандай фойдали хусусиятлари бор? Қуйида бу резавор қанчалик парҳез боп эканини билиб олинг.

Қулупнай нима учун фойдали?

Озиқ моддаларнинг таркиби: А, C, PP, B, E, К витаминлари, толалар, каротеноидлар, фолий кислота, магний, цинк, натрий, темир, калций, мис ва бошқалардан иборат. Буларнинг барчаси биргаликда метаболизмни, иштаҳани ва ичак фаолиятини яхшилайди, яллиғланиш жараёнларининг олдини олади.

Бундан ташқари, қулупнай вазн йўқотишга ҳисса қўшади, чунки у ёғларни парчалайди ва қонда қанд даражасини нормаллантиради. Юрак-қон томир тизими, иммунитет, кўриш, асаб тизими, бўғимларда ижобий таъсир сезилади.

Шуни унутмангки, бу резавор диуретик таъсирга эга бўлгани учун организмни ёшартиради. Чунки у ҳужайраларнинг янгиланишини кучайтиради ва уларнинг қаришини олдини олади. Қулупнай таркибидаги фолий кислотаси камқонлик ва ҳомиладорликда ҳам фойдалидир.

Ким учун зарарли?

Катта афзалликларга қарамай, қулупнайни истеъмол қилишда бир қатор чекловлар мавжуд. Қулупнай кучли аллергендир, шу боис эрта ёшдаги болалар ва аллергия билан касалланганлар уни ейишдан тийилиши керак. Шу билан бирга гастрит, ошқозон яраси, цистит ва буйрак касалликларида резавор меваларни истеъмол қилиш ярамайди, чунки унда жуда кўп миқдорда мева кислоталари мавжуд.

Кунига қанча миқдорда қулупнай ейиш мумкин?

Меваларнинг кунлик истеъмоли, жумладан, резаворлар: 300 - 400 грамм. Қулупнай ва бошқа резаворлар агар уларни тўғри тарзда истеъмол қилсангиз, албатта, фойда келтиради.

Қулупнайни эрталаб газак сифатида ёки асосий овқатдан олдин истеъмол қилган маъқул. Уни оч қоринга ёки кечки пайт емаслик керак. Агар калориялар ҳақида гапирадиган бўлсак, 100 грамм қулупнайда ўртача 32,5 килокалория бор. Аммо бу резавор кўпинча шакар, сметана ёки қаймоқ билан истеъмол қилинганлиги боис калория миқдори сезиларли даражада ошади.

Қулупнайнинг яхшисини қандай танлаш керак?

Шубҳасиз, ўзингиз томорқада ўстирган қулупнай энг яхшисидир. Аммо бунинг иложи бўлмаса, дўкон ёки бозорлардан сотиб олаётганда меванинг ранги ва ҳидига эътибор беришингиз керак. Қулупнай жуда тўқ рангда ва ёқимсиз ҳидга эга бўлмаслиги зарур. Агар мева илдизидан осонгина ажралса, демак у ҳаддан ташқари пишиб кетган. Шунингдек доғлари бўлган ёки ҳали пишиб етилмаган қулупнайни сотиб олишдан сақланинг.