Ko‘pchilik qulupnayni iste’mol qilish kerakligini ta’kidlaydi. Xo‘sh, qulupnayning inson organizmi uchun qanday foydali xususiyatlari bor? Quyida bu rezavor qanchalik parhez bop ekanini bilib oling.
Qulupnay nima uchun foydali?
Oziq moddalarning tarkibi: A, C, PP, B, E, K vitaminlari, tolalar, karotenoidlar, foliy kislota, magniy, sink, natriy, temir, kalsiy, mis va boshqalardan iborat. Bularning barchasi birgalikda metabolizmni, ishtahani va ichak faoliyatini yaxshilaydi, yallig‘lanish jarayonlarining oldini oladi.
Bundan tashqari, qulupnay vazn yo‘qotishga hissa qo‘shadi, chunki u yog‘larni parchalaydi va qonda qand darajasini normallantiradi. Yurak-qon tomir tizimi, immunitet, ko‘rish, asab tizimi, bo‘g‘imlarda ijobiy ta’sir seziladi.
Shuni unutmangki, bu rezavor diuretik ta’sirga ega bo‘lgani uchun organizmni yoshartiradi. Chunki u hujayralarning yangilanishini kuchaytiradi va ularning qarishini oldini oladi. Qulupnay tarkibidagi foliy kislotasi kamqonlik va homiladorlikda ham foydalidir.
Kim uchun zararli?
Katta afzalliklarga qaramay, qulupnayni iste’mol qilishda bir qator cheklovlar mavjud. Qulupnay kuchli allergendir, shu bois erta yoshdagi bolalar va allergiya bilan kasallanganlar uni yeyishdan tiyilishi kerak. Shu bilan birga gastrit, oshqozon yarasi, sistit va buyrak kasalliklarida rezavor mevalarni iste’mol qilish yaramaydi, chunki unda juda ko‘p miqdorda meva kislotalari mavjud.
Kuniga qancha miqdorda qulupnay yeyish mumkin?
Mevalarning kunlik iste’moli, jumladan, rezavorlar: 300 - 400 gramm. Qulupnay va boshqa rezavorlar agar ularni to‘g‘ri tarzda iste’mol qilsangiz, albatta, foyda keltiradi.
Qulupnayni ertalab gazak sifatida yoki asosiy ovqatdan oldin iste’mol qilgan ma’qul. Uni och qoringa yoki kechki payt yemaslik kerak. Agar kaloriyalar haqida gapiradigan bo‘lsak, 100 gramm qulupnayda o‘rtacha 32,5 kilokaloriya bor. Ammo bu rezavor ko‘pincha shakar, smetana yoki qaymoq bilan iste’mol qilinganligi bois kaloriya miqdori sezilarli darajada oshadi.
Qulupnayning yaxshisini qanday tanlash kerak?
Shubhasiz, o‘zingiz tomorqada o‘stirgan qulupnay eng yaxshisidir. Ammo buning iloji bo‘lmasa, do‘kon yoki bozorlardan sotib olayotganda mevaning rangi va hidiga e’tibor berishingiz kerak. Qulupnay juda to‘q rangda va yoqimsiz hidga ega bo‘lmasligi zarur. Agar meva ildizidan osongina ajralsa, demak u haddan tashqari pishib ketgan. Shuningdek dog‘lari bo‘lgan yoki hali pishib yetilmagan qulupnayni sotib olishdan saqlaning.
Izoh (0)