Бокс бўйича Жаҳон чемпионатининг 10 май кунги баҳсларида ўзбекистонлик яна уч нафар боксчи ўз жангини ўтказди.
-63,5 кг вазн тоифаси вакили Руслан Абдуллаев франциялик Лоунес Хамраоуига қарши рингга чиқди. Мазкур беллашувда Ўзбекистон вакили 4:1 ҳисобидаги ғалабани қўлга киритганди.
Абдуллаев бунга қадар испаниялик Оер Ибаррече, Пуэрто-Рико вакили Мануэл Фебус ва маврикийлик Ричанро Колинни мағлубиятга учратганди.
-71 кг вазн тоифасида ҳаракат қиладиган Саиджамшид Жаъфаров мазкур босқичда Россия вакили Игор Свиридченковга қарши жанг қилди. Жанг тўлиқ Жаъфаровнинг устунлигида ўтди ва ҳакамларнинг барчаси унинг ғалабасини қайд этди — 5:0.
Саиджамшид аввалги босқичларда мозамбиклик Осорио Муханга, мексикалик Марко Вердени енгган, нимчорак финалда Пуэро-Рико вакили Габриэль Лланосга қарши жанги эса рақибнинг жароҳати сабаб ўтказилмаганди.
-92 кг вазн тоифасида Ўзбекистон шарафини ҳимоя қилаётган Лазизбек Муллажонов кубалик тажрибали боксчи Хулио Сезар Ла Круз билан тўқнаш келди. Муросасиз баҳсда Муллажонов фаолроқ ҳаракат қилди ва 4:1 ҳисобида ғалаба қозонди.
Маълумот учун, ла Круз беш карра жаҳон чемпиони, икки карра Олимпия ўйинлари олтин медал соҳиби ҳисобланади.
Лазизбек ушбу босқичга қадар колумбиялик Марло Хартадо ва грузиялик Гиорги Тчигладзени мағлуб этишга муваффақ бўлганди.
Аввалроқ Ҳасанбой Дўстматов ва Абдумалик Ҳалоков ўз жангларини ғалаба билан якунлаб, ярим финалга йўлланма олганди.
Изоҳ (0)