Наманган давлат университетида эркак ўз хотинини пичоқлаб ўлдиргани ҳақида хабар берилган эди. Вилоят оила ва хотин-қизлар бошқармаси матбуот хизмати ҳолатга муносабат билдирди.
Маълум қилинишича, 6 май куни соат 12:00 да Тўрақўрғон туманида яшовчи фуқаро Наманган давлат педагогика институти биноси олдида оилавий келишмовчилик сабабли турмуш ўртоғи билан жанжаллашиб, уни пичоқлаб, ўлимига сабабчи бўлган тан жароҳати етказган.
Бош прокуратура матбуот хизмати бошлиғи Ҳаёт Шамсутдиновнинг ёзишича, эркак 26 ёшда, аёл эса 23 да бўлган. Хотини пичоқлаганидан кейин у ўзига бир неча маротаба пичоқ билан жароҳат етказиб, ўз жонига суиқасд қилган. Воқеа жойида бўлган фуқаролар томонидан ўзини пичоқлаган эркак шифохонага ҳушсиз ҳолатда олиб борилган.
Аниқланишича, ушбу жиноятни содир қилган шахс турмуш ўртоғи билан 2022 йилнинг январь ойидан буён ўзаро оилавий жанжал сабабли ажрашиб, бирга яшамасдан келган. Шундан сўнг у турмуш ўртоғини ўзи билан бирга яшашга мажбур қилиб, асоссиз рашк қилиб келган ҳолда бир неча маротаба жанжаллашиб юрган.
Вилояти оила ва хотин-қизлар бошқармаси матбуот хизмати уларнинг бир нафар фарзанди борлигини маълум қилди. Оилада келишмовчиликлар бўлгани сабабли аёл ота уйига кетган. 2022 йил апрель ойида ушбу оила оилавий қадриятларни мустаҳкамлаш комиссияси томонидан яраштирилади.
Маълум муддатдан сўнг яна оиладаги низолар ортиб боради. Жуда кўп мурожаатларидан сўнг иккала маҳалла МФЙ фаоллари ажримга хулоса беришга мажбур бўлади. Оилани тиклаш имкони бўлмагани учун судга қилинган мурожаатларидан сўнг суд ажрим учун 6 ой муҳлат берган ва ҳозиргача 5 ой ўтган.
Мазкур ҳолат юзасидан Наманган шаҳар прокуратураси томонидан Жиноят кодексининг 97-моддаси билан жиноят иши қўзғатилиб, гумон қилинувчи процессуал тартибда ушланган ва ҳозирда тергов ҳаракатлари олиб борилмоқда.
Пичоқлаш билан якунланган оилавий жанжаллар
Март бошларида Бухорода эр жанжал сабаб хотинини пичоқлагани, Жиззахда эр рашк сабаб аввал хотинини кейин эса ўзини пичоқлаб ўлдиргани, Вобкент туманида маст фуқаро қайнукасини пичоқлагани тўғрисида хабар берилганди.
Шунингдек, 2022 йилнинг декабрида Тошкент вилоятида келин оилавий келишмовчилик оқибатида қайнонасини камида 20 маротаба пичоқлаган эди. Ушбу ҳолат юз берган хонадонда қайнона-келин чиқиша олмай қолган. Пичоқланган қайнонанинг айтишича, 9 ойдан бери келини унинг гапларига кирмай, айтган ишларини қилмай келган.
Изоҳ (0)