Жорий йилнинг I ярмида республикада туғилган чақалоқлар сони 2024 йил мос давридагидан 14,4 минг нафарга камайди. Бу ҳақда Статистика қўмитаси маълум қилди.
Аҳоли сони кўпайди
2025 йил 1 июль ҳолатига кўра, Ўзбекистон аҳолиси сони 37 миллион 860 минг кишига етди. Мазкур кўрсаткич 2024 йил июлидагига нисбатан 2 фоизга кўп. Ярим йил давомида аҳоли сонининг табиий ўсиши 321,4 минг кишига тенг бўлди.
Энг кўп аҳоли Самарқанд (4,3 млн киши) ва Фарғона (4,2 млн киши) вилоятларида яшамоқда. Энг кам аҳоли эса Сирдарё вилоятида — 938,5 минг киши.
Туғилиш қисқариб, ўлимлар кўпайди
Ўзбекистонда 2025 йил январь июнь ойларида 405,5 минг чақалоқ туғилди. Шундан 209,6 минг нафари ўғил (51,7 фоиз), 195,9 минг нафари (48,3 фоиз) қиз болалар. Шаҳар жойларида 197,8 минг, қишлоқларда 207,7 минг чақалоқ дунёга келган.
Жорий туғилишлар сони 2024 йил мос даврига нисбатан 14,4 минг нафарга, 2023 йил I ярмига қараганда 29,1 минг нафарга камайган.
Олти ой давомида мамлакатда вафот этганлар сони 84,1 минг кишини ташкил этган. Шундан эркаклар 46,2 минг киши (54,9 фоиз), аёллар 37,9 минг киши (45,1 фоиз) бўлган. Оламдан ўтганларнинг 45,6 минг нафари шаҳарларда (54,2 фоиз), 38,5 минг нафари қишлоқларда (45,8 фоиз) яшаган.
Умуман олганда, ўлимлар сони 2024 йил июль ойидагидан 2,7 мингтага, 2023 йил мос давридагидан 4,4 мингтага кўпайган.
Никоҳлар камайиб, ажрашиш кўпайди
Олти ой мобайнида республикада жами 95,3 мингта никоҳ тузилган. Бу рақам 2024 йил мос давридагидан 2,1 мингтага кам. Никоҳларнинг 48,7 мингтаси (51,1 фоиз) шаҳарларда, 46,6 мингтаси қишлоқларда қайд этилган.
Ярим йил ичида никоҳдан ажралишлар сони 23,3 мингтани ташкил этган (ўтган йил мос давридагидан 800 тага кўп). Ажрашишлар шаҳарларда 14,1 мингта (60,6 фоиз), қишлоқларда 9,2 мингта бўлган.
Уч йиллик кўрсаткичлар
2024 йилда Ўзбекистонда 926,4 минг нафар бола туғилган. Шундан 479,5 минг нафари ўғил, қолган 446,9 минг нафари қизлар. Ўтган йили мамлакатда 2018 йилдан бери биринчи марта туғилишнинг йиллик ўсиши тўхтаган.
Йил давомида туғилганлар сони нафақат 2023 йил, балки 2022 йил кўрсаткичидан ҳам паст бўлган. Туғилишнинг камайиши республиканинг барча ҳудудларини қамраб олган.
2024 йил январь–декабрь ойларида мамлакатда вафот этганлар сони 174,4 минг кишини ташкил этган. Шундан эркаклар 96 минг, аёллар 78,4 минг нафар. Қазо қилганлардан 98,2 минг нафари шаҳарларда, қолган 76,2 минг нафари қишлоқларда яшаган.
Умуман олганда, охирги уч йилда ўлимлар сони ошиб борган. Жумладан, 2022 йилда республикада 172,1 минг киши, 2023 йилда 172,8 киши оламдан ўтган.
Ўтган йили қайд этилган ўлимларнинг 57,6 фоизи қон айланиш тизими касалликларидан келиб чиққан. Қолган қисмига қуйидаги омиллар таъсир қилган:
- 9,4 фоизи — ўсимталардан;
- 6,3 фоизи — нафас олиш аъзолари касалликларидан;
- 5,8 фоизи — бахтсиз ҳодиса заҳарланиш ва жароҳатланишлардан;
- 4,1 фоизи — овқат ҳазм қилиш аъзолари касалликларидан;
- 1,1 фоизи — юқумли ва паразитар касалликлардан;
- 15,7 фоизи — бошқа касалликлардан вафот этганлар.
Ўлимлар сонининг энг кўп улуши Самарқанд (18 минг 854 та), Фарғона (17 минг 880), Андижон (17 минг 815 та), Тошкент (16 минг 393 та) вилоятлари ҳамда Тошкент шаҳрида (16 минг 720 та) қайд этилган.
Изоҳ (0)