Ўзбекистон терма жамоаси ва Москванинг “ЦСКА” клуби футболчиси Аббосбек Файзуллаевнинг “Башакшеҳир” клубига трансфери амалга ошмаслиги мумкинлиги ҳақида хабарлар тарқалди. Унга кўра, футболчи тиббий кўрикдан муваффақиятли ўта олмаган.
Бироқ “ЦСКА” матбуот котиби Кирилл Брейдо бу маълумотларни рад этди. Унинг таъкидлашича, Файзуллаев 22 июль куни Туркияга етиб борган ва тиббий кўрик 23 июль куни, яъни эртага ўтказилиши режалаштирилган.
Аббос трансфер бўйича тиббий кўрикдан ўтиш учун жўнаб кетди. Текширув эртага бошланади. Ҳозирча клублар трансфер битимини расмийлаштириш устида иш олиб бормоқда, — деди Брейдо Матч TV нашрига берган изоҳида.
Эслатиб ўтамиз, аввалроқ айрим ОАВда Файзуллаев “Башакшеҳир” учун ўтказилган тиббий кўрикдан ўта олмагани ҳақида хабарлар тарқалган эди.
Маълумот учун, Файзуллаев “ЦСКА” таркибида ҳозиргача жами 72 учрашувда майдонга тушиб, 8 та гол ва 22 та голли узатмага муаллифлик қилган. Transfermarkt портали унга 8 миллион евро қиймат белгилаган.
Ўзбекистон терма жамоаси аъзоси 7,5 миллион евро эвазига “Башакшеҳир” клубига ўтиши кутилмоқда. Манбаларга кўра, у Истанбул клуби билан 2 ёки 3 йиллик шартнома имзолайди.
Изоҳ (0)