Ўзбекистон соғлиқни сақлаш вазири Амрилло Иноятов бошчилигидаги делегация АҚШга хизмат сафари давомида Гарвард университети раҳбарияти билан учрашув ўтказди. Бу ҳақда ССВ матбуот хизмати хабар берди.
Қайд этилишича, учрашувда мазкур университет билан кенг кўламли ҳамкорлик бўйича қатор келишувларга эришилган. “Хусусан, Гарвард геномика маркази билан тиббий-генетика соҳасидаги келишув юртимизда ушбу йўналишни тизимли равишда йўлга қўйиш учун муҳим асос бўлди”, — дейилади хабарда.
Маълум қилинишича, мазкур ҳамкорлик Ўзбекистонда тиббий генетика бўйича марказ ташкил этиш, уни энг сўнгги ва замонавий тиббий жиҳозлар билан таъминлаш, АҚШ университетида ўзбекистонлик мутахассисларни қайта тайёрлаш ва малакасини оширишни ўз ичига олади.
Шунингдек, соғлиқни сақлаш тизими раҳбар кадрларини ўқитиш, тиббий генетика мутахассислари малакасини ошириб, улардан тренерлар тайёрлаш, таълим бўйича Гарвард университети билан Ўзбекистондаги соҳага дахлдор олий ўқув юртлари, ихтисослашган марказлар ўртасида ҳамкорликни йўлга қўйиш, илмий алоқаларни кенгайтириш режалаштирилган.
Бинобарин, Ўзбекистонда ташкил этиладиган Тиббий генетика марказининг архитектураси, дизайни, стратегия ва концепциясини биргаликда ишлаб чиқиш масаласи муҳокама этилган.
“Ўз навбатида, ҳамкорларимиз Тошкент тиббиёт академиясининг Биотехнологиялар маркази таркибидаги генетик илмий лаборатория базасида ўзаро алоқаларни ривожлантиришга розилик билдирди”, — дея таъкидланади хабарда.
Апрель охирларида Ўзбекистон Германия “Helios Klinikum Northheim” клиникалари билан хирургия ва онкология соҳасида ҳамкорликни йўлга қўйиши маълум бўлганди. Мартда эса Ўзбекистонда тиббиёт кадрлари тайёрлашда Россия билан ҳамкорлик кенгайиши айтилган эди.
Изоҳ (0)