O‘zbekistonda tibbiyot kadrlari tayyorlashda Rossiya bilan hamkorlik kengayadi

O‘zbekiston sog‘liqni saqlash vaziri Amrillo Inoyatov boshchiligidagi delegatsiya “Sog‘lom jamiyat” forumida ishtirok etish uchun Rossiya Federatsiyasining Sankt-Peterburg shahrida safarda bo‘lib turibdi. 

Vazirlik axborot xizmatiga ko‘ra, tadbir oldidan vakillar ilk uchrashuvni Sankt-Peterburg shahri gubernatori o‘rinbosari Oleg Ergashev bilan o‘tkazgan. Muloqotda vazir sog‘liqni saqlash sohasi bo‘yicha o‘zaro hamkorlik aloqalari keyingi yillarda rivojlanayotgani, bunda ikki davlat rahbarlarining hissasi borligini ta’kidlagan. 

Ma’lum bo‘lishicha, Sankt-Peterburg davlat pediatriya tibbiyot universiteti va Qoraqalpog‘iston tibbiyot instituti o‘rtasida erishilgan kelishuvga muvofiq, xalqaro qo‘shma ta’lim dasturi asosida klinik ordinatura tashkil etilgan. Kelgusida Orolbo‘yi mintaqasida ikki oliy o‘quv yurtining qo‘shma klinikasini ochish rejalashtirilyapti.

Shuningdek, muloqotda O‘zbekiston Respublikasi ixtisoslashtirilgan onkologiya va radiologiya ilmiy-amaliy tibbiyot markazi hamda Sankt-Peterburg shahridagi Rossiya Federatsiyasi Sog‘liqni saqlash vazirligi N.Petrov nomidagi onkologiya milliy tadqiqot markazi o‘rtasida klinik ordinatura bo‘yicha qo‘shma ta’lim dasturini amalga oshirish masalasi ko‘rib chiqilgan.