Қашқадарёда жазманини дарахт шохи билан уриб ўлдириб, ялонғоч ҳолда уйига ташлаб кетган эркакка ҳукм ўқилди

Қашқадарё вилоятининг Шаҳрисабз туманида 36 ёшли аёл 37 ёшли жазмани томонидан уриб ўлдирилгани ҳақида хабар берилган эди. Мазкур ҳолат юзасидан эркакка нисбатан суд ҳукми ўқилди.

Ҳолат 2023 йил 1 январь куни соат 19:00 ларда содир бўлган. 1987 йилда вилоятнинг Яккабоғ туманида туғилган аёл С.С. Шаҳрисабз туманининг Тепар қишлоғида яшовчи таниши Х.С. билан ишқий муносабатга киришиш учун бошқарувидаги Lacetti’да очиқ дала майдонига борган.

Мазкур дала майдонига борган 36 ёшли аёл ва 37 ёшли эркак ўзаро тортишиб қолган. Шунда аёл танишининг ғурурига тегувчи сўзлар айтиб, уни ҳақорат қилган. С.Х. эса бунга чидолмай танишини қўли билан уриб, оғир тан жароҳати етказган. Шундан сўнг аёл қочиб кетган. Бир оз вақт ўтгач яна машина ёнига қайтган. Бундан ғазабланган эркак уни дарахт шохлари билан уриб, ҳушини йўқотишига сабаб бўлган. 

Айтилишича, эркак унга оғир тан жароҳати етказгач, яланғоч ҳолда Lacetti’сига миндирган, шу ҳолатида ҳовлисининг ёнига олиб бориб ташлаган. Аёлнинг 2009 йилда туғилган вояга етмаган ўғли Л.А. онасини кўриб қолиб, қўшниларини ёрдамга чақирган. 2023 йил 2 январь куни соат 03:00 ларда аёл бош мия ёпиқ жароҳати, бош миянинг оғир даражада лат ейиши, бош миянинг 4-даражали комаси, тананинг кўплаб соҳаларида юмшоқ тўқималари эзилиши каби тан жароҳатлари билан тез ёрдам машинасида Шаҳрисабз туман тиббиёт бирлашмаси жонлантириш бўлимига олиб келинган. Шифокорлар томонидан кўрсатилган тиббий муолажага қарамасдан шифохонада вафот этган. 

Судда судланувчи ва жабрланувчиларнинг кўрсатмалари тингланиб, сабаблар ҳам муҳокама қилинди. Суднинг тегишли қарори билан айбдор озодликдан маҳрум этилди.