Хонанда Бейонсе 2,69 миллион доллар солиқ тўлашдан бош тортганликда айбланмоқда

АҚШ Солиқ бошқаруви америкалик хонанда Бейонсени 2,69 миллион доллар солиқ тўламаганликда айбламоқда.

Агентлик маълумотларига кўра, хонанда 2018 йил учун 805 850 доллар, 2019 йил учун эса 1 442 747 доллар солиқ тўлаши керак. Шунингдек, ташкилот Бейонсе яна икки йиллик 449 719 доллар миқдорида жарима тўлаши кераклигини даъво қилмоқда.

Нашрнинг хабар беришича, Бейонсе вазиятга жавоб қайтарган. Хонанда ташкилот қарорига рози эмас, у солиқ идорасига ариза билан мурожаат қилган ва Лос-Анжелесда суд жараёнини ўтказишни сўраган.

“Биз бу ташкилот билан ишлаяпмиз ва масала тез орада ҳал этилишини кутмоқдамиз”, — дейди хонанданинг адвокати Майкл Коэн.

Қайд этилишича, хонанданинг адвокатлари 868 766 доллар солиқ тўлашга эътироз билдиришга муваффақ бўлган.

Бейонсе фаолияти давомида бир қанча хайрия ташкилотларини қўллаб-қувватлаган. У 2013 йилда иқтисодий тенгсизликка қарши кураш, маргиналлашган жамоаларни қўллаб-қувватлаш, таълим имкониятларини тақдим этиш ва тадбиркорликни ривожлантиришга бағишланган BeyGOОD жамғармасига асос солган. Ҳозирча хонанданинг 868 766 доллар маблағни қайси ташкилотга хайрия қилгани маълум қилинмаган.

Бейонсе дунёдаги энг кўп ҳақ олувчи хонандалардан бири. Ўтган йили Forbes унинг умумий бойлигини 450 миллион долларга баҳолаган.