Миллиардга яқинлашган кўришлар, миллион томошабин, 114 кунлик концерт. Даврон Кабулов “Миллион”нинг 10 йил давомида эришган ютуқлари ҳақида (видео)

“Миллион” кулги жамоаси етакчиси Даврон Кабулов “Дарё”га берган интервьюсида шу кунгача эришган ютуқлари, ҳамда жамоага қимматга тушган томошалар ҳақида гапирди. 



— Санъаткорлар орасида гапиришни хоҳлайдиганлар шундоқ ҳам кам эмас. Фикримча, биз гапиришимиз керак эмас, бизнинг натижаларимиз гапирилиши керак. Ўтган 10 йил ичида ‘Халқлар дўстлиги’ санъат саройида 114 кун концерт берилган. Ярим миллионга яқин томошабин мана шу концерт залидан туриб томоша қилган. Қўшни республикалар, вилоятлар, амфитеатрлар ва бошқа саройлардаги концертларни қўшиб ҳисобланса ‘Миллион’нинг томошабинлари миллиондан ошибди. YouTube орқали кўришлар сони эса миллиардга яқинлашмоқда. Бу ҳам назаримда кичкина натижа эмас. Бу ҳаммаси бюджетдан бир сўм пул олмайдиган жамоанинг натижалари. 12 кишилик, бировдан ёрдам кутмайдиган, кези келса, айрим мутасаддилар чўқилашни яхши кўрадиган жамоанинг натижалари. Ўйлайманки, иккинчи ўн йилликда ‘Миллион’ янгича кўринишда саҳнага чиқади. Чунки жамоада энг узоқ вақт фаолият юритган Миркомил Мусаев мана шу концерт орқали фаолиятларини якунлаяптилар.  

— Миркомил Мусаевни жамоада олиб қолиш учун қандай ҳаракатлар қилдингиз?

— Миркомил Мусаевни жамоада олиб қолиш учун 5 йилдан бери ҳаракат қиламан. 2018 йилда ‘Бўлди, энди, жамоадаги фаолиятимни якунламоқчиман’, деганларида ‘Ака, жамоадаги янги йигитларга мослашиб олишларига ёрдам беринг’, деганман. Шунда ‘бўлмаса, кейинги йил’, деб чўзилиб-чўзилиб, 2023 йилда кетадиган бўлдилар. Танганинг иккинчи томони бор, уларнинг ҳам қарорларини ҳурмат қилишимиз керак. Жамоадан қайсидир иштирокчи чиқиб кетадиган бўлса, у албатта уриш-жанжал билан, Даврон билан уришиб чиқиб кетавермайдику?  

— Фаолиятингиз давомида жамоага қимматга тушган саҳна кўринишлари бўлганми?

— 2016 йилда Каниза билан саҳна кўриниши ‘Миллион’нинг минусига ишлаган. Кулги жамоасининг ижодига эътибор берадиган бўлса, ўз дастурига энг яхши санъаткорларни таклиф қилишга интилади. Масалан, Фарруҳ Зокиров, Юлдуз Усмонова, Озодбек Назарбеков, ”Болалар” гуруҳи, Жаҳонгир Отажонов. Булар ҳаммаси санъати муҳокама қилинмайдиган санъаткорлар. Канизани юмор қилиш нуқтаи назаридан таклиф қилган эдик. Хонанданинг ўзи йўқ жойдан муаммо ясаган. 

“Миллион” кулги жамоасининг янги концертидан репортажни қуйида тўлиқ томоша қилишингиз мумкин.