Ижтимоий тармоқларда Тошкент шаҳрига олиб келинган янги электробусларни зарядлашда муаммолар пайдо бўлгани, транспорт воситалари график асосида бекатларга ўз вақтида келмаётгани тўғрисида хабар тарқалганди. “Тошшаҳартрансхизмат” АЖ раиси Анвар Жўраев “Дарё” мухбирига берган интервьюсида айрим электробуслар нега жадвалдан кеч қолгани сабабини тушунтирди.
Анвар Жўраевнинг айтишича, автобус парки масъул ходимининг электробуслар жадвалини энг тиғиз вақтда ишни нотўғри тақсимлагани сабаб интервалнинг чўзилиши юзага келган.
“Ўтган куни 28-автобус йўналишида 20-25 дақиқалик оралиқ интервалнинг пайдо бўлганига сабаб мутасадди раҳбарларнинг ишни тўғри тақсимламагани билан боғлиқ. Бу хатоси учун уларга нисбатан интизомий чора кўрилди. Бундай ҳол такрорламаслиги учун барча — 8 та автокорхона раҳбарлари билан йиғилиш ўтказилиб, жадвалларни тўғри ташкил этилиши зарурлиги тушунтирилди. Қувватлаш станцияларини тўғри ишлатиш бўйича кўрсатмалар берилди”, – деди ташкилот раҳбари.
Анвар Жўраевнинг қўшича қилишича, айни пайтда учта автобус саройида электробусларни қувватлаш станциялари ишламоқда.
“Бугунги кунда 1-, 7- ва 8-автобус саройларида электробусларни қувватлаш станциялари ишга туширилган. Қолган корхоналарда монтаж ишлари олиб бориляпти. Янги электробуслар апрель ойида 150 та қувватлаш станциялари билан бирга олиб келинган. Улар май ойи якунигача барча автокорхоналарга ўрнатилиб, ишга туширилади ва электробусларни зарядлаш билан боғлиқ камчиликлар бартараф этилади”, – дея маълум қилди у.
Ҳозирда “Тошшаҳартрансхизмат”нинг “8-автобус саройи” филиалида 30 та ва “7-Автобус саройи” филиалида 28 та электр станциялари тўлиқ ишга туширилган. Мазкур станциялар электробусларни 4-5 соат давомида тўлиқ қувватлаш имкониятини бермоқда. Тез кунларда автобус саройлари ҳудудида қурилаётган 80 та электр қувватлаш станциялари фойдаланишга топширилиши белгиланган.
Аввалроқ Анвар Жўраев Тошкентда автобус томидаги қоплама нега қўпорилиб тушганига изоҳ берганди.
Изоҳ (0)