Ўзбекистоннинг уч ҳудудида пул эвазига ўқишга киритиб қўйишни ваъда қилганлар ушланди

Самарқанд, Сирдарё ва Бухоро вилоятларида ўқишга киритиб қўйишни ваъда қилган шахслар ушланди. Бу ҳақда Иқтисодий жиноятларга қарши курашиш департаменти ахборот хизмати хабар берди. 

Хабарга кўра, Бош прокуратура ҳузуридаги департамент ҳамда ДХХнинг Самарқанд вилояти бошқармалари томонидан ўтказилган тадбирда фуқаро Ш.Ж. фуқаро М.Э.га танишлари ёрдамида Самарқанд тиббиёт институтига ўқишга киритиб қўйиши ва C1 даражасидаги миллий сертификат олиб бериши эвазига 7200 АҚШ долларни олган вақтида ашёвий далиллар билан ушланган. 

Шунингдек, департаментнинг Ховос туман бўлими томонидан ўтказилган тезкор тадбирда, фуқаро Ч.Р. фуқаро Г.С.нинг ишончига кириб, уни танишлари ёрдамида хусусий университетлардан бирига 3-босқичдан ўқишга киритиб қўйиши ва кейинчалик ўқишини Гулистон давлат университетига кўчириб бериши эвазига 5 000 АҚШ долларини олган вақтида ашёвий далиллар билан ушланган.

Шу каби, департаментнинг Бухоро вилоят бошқармаси томонидан ўтказилган терговга қадар текширувда фуқаро Ф.I. фуқаро М.Ш.га ўзини Бухоро тиббиёт коллежида ишлашини айтиб, унинг келини Н.Ж.ни ушбу таълим муассасасига ўқишга киритиб қўйиш эвазига 1300 АҚШ долларини  қўлга киритгани аниқланган. Ф.И. ушбу пуллар ҳисобидан 3,8 миллион сўмини қайтаргани процессуал тартибда расмийлаштирилган.

Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.