Жиззах вилояти Ғаллаорол туманида ҳамқишлоғи билан орани очиш мақсадида борган эркак муштлашув сабаб ҳалок бўлди. Бу ҳақда вилоят ИИБ ахборот хизмати хабар берди.
Хабарга кўра, туманнинг “Мулкуш” маҳалла фуқаролар йиғинида яшовчи 1986 йилда туғилган фуқаро орани очиқ қилиш мақсадида 1983 йилда туғилган ҳамқишлоғининг фермер хўжалиги даласига борган. Шу ерда қишлоқдошлар муштлашган. Оқибатда 1986 йилда туғилган фуқаро оғир тан жароҳатлари олган. Шундан сўнг фермер ҳушини йўқотган ҳамқишлоғини ўзи яшайдиган кўчага олиб бориб, турмуш ўртоғига топширган.
Кўп ўтмай у вафот этган. Ўтказилган суд тиббий экспертизаси фуқаронинг ўлимига бош мия тўқималарига қон қуйилиши, чап томон иккинчи, ўн биринчи қовурғалар, ўнг томон 6-11-қовурғалар, чап буйрак ва талоқ ёрилиши сабаб бўлганини кўрсатган.
Айни пайтда айбдор ҳибсхонада. Ушбу жиноятга 15 апрель куни қишлоқдошларнинг дўконда спиртли ичимликлар борасида гап талашиб қолгани сабаб бўлган.
Изоҳ (0)