Тошкент шаҳрини 250 млрд долларга сотувга қўйган шахс мактаб ўқувчиси бўлиб чиқди

ИИВ Киберхавфсизлик маркази интернет савдо платформаси орқали Тошкент шаҳрини сотувга қўйган шахсни аниқлади.

Апрель ойи бошларида 15 ёшли А.А. Оlx савдо платформасида “Тошкент шаҳри сотилади!” мазмунида эълон жойлаштирган ва унинг бошланғич нархини 250 миллиард доллар деб белгилаган.

Ушбу эълон ижтимоий тармоқларда эътирозли муҳокамаларга сабаб бўлди.

Савдо платформаси бош директорининг айтишича, эълон бир неча дақиқадан сўнг блокланган. Мутахассис фойдаланувчилардан эълонларни жойлаштиришда барча маълумотлар тўғри ва ҳаққоний бўлишига эътибор қаратишларини сўраган.

Юқоридаги эълонни жойлаштирган 8-синф ўқувчиси бу ишни шунчаки ҳазил учун қилганини, бундай салбий муҳокамалар келтириб чиқариши мумкинлигини ўйлаб кўрмаганини қайд этган.

Март бошларида Тошкент шаҳрида квартира ижарага берилиши тўғрисида ёлғон маълумотларни жойлаштириб, фуқароларни чув тушириб юрган шахсга нисбатан жиноят иши қўзғатилганди.