НАТО бош котиби Йенс Столтенберг алянсга аъзо давлатларни қурол ва ўқ-дорилар ишлаб чиқаришни кўпайтиришга ҳамда заҳираларни тезроқ тўлдиришга чақирди. Бу алянснинг тийиб туриш қобиляти ва мудофаасини кучайтириб, унга Украинани қўллаб-қувватлашда давом этиш имконини беради, дейилади НАТО матбуот хизмати хабарида.
“Биз бугун олдинга қараб ва тезроқ силжиш учун шу ердамиз”, — деди Столтенберг 26 апрель куни НАТО штаб-квартирасида Миллий қурол-яроғ бўйича директорлар конференциясининг (CNAD) икки кунлик йиғилишини очиб берар экан. Бош котиб НАТО салоҳиятини талаб даражасида ошириш ва саноат корхоналари билан ҳамкорликда ишлашнинг муҳимлигини қайд этган.
Алянс матбуот хизмати таъкидлаганидек, йилига камида икки марта йиғиладиган CNAD иштирокчиларининг вазифаси ҳарбий имкониятларни оширишда муносиб ҳамкорларни топиш. Бу эса НАТО кучларини энг илғор имкониятлар билан таъминлайди.
Ўтган ҳафта Столтенберг НАТО Украинани қўллаб-қувватлашини яна бир бор таъкидлаган эди. “Биз рус босқинчиларига қарши қаҳрамонона курашда ва мамлакатингиз ҳимоясида сиз билан биргамиз. Эртага ўзингизни қайта тиклаётганингизда ва Украина халқининг порлоқ келажаги учун меҳнат қилаётганингизда ҳам ёнингизда турамиз”, — деди у Киевда Украина президенти Владимир Зеленский билан учрашувдан кейинги баёнотида.
20 май куни Йенс Столтенберг кутилмаган ташриф билан Киевга келганди.
Июль ойида Вилнюсда НАТО саммити бўлиб ўтади. Алянснинг кўплаб аъзолари ушбу йиғилишда Украинага НАТОга қўшилиш бўйича “йўл харитаси”ни тақдим этиш тарафдори. Шу билан бирга АҚШ, Германия ва Венгрия бунга қарши эканини билдирган.
Изоҳ (0)