12—23 июнь кунлари НАТО давлатлари Air Defender 2023 номли ўз тарихидаги энг йирик ҳарбий ҳаво машқларини ўтказади. Бу ҳақда АҚШ Миллий гвардияси сайтида хабар берилди.
Қайд этилишича, машғулотлар, хусусан, Россия билан чегарадош давлатлар ҳудудида ўтказилади. Air Defender 2023 нинг мақсади НАТО авиатехникаларини қисқа фурсатда тегишли нуқталарга жойлаштириш ва улардан фойдаланиш қобилиятини синаб кўриш бўлади.
Машғулотларга 23 турдаги 220 га яқин самолётлар жалб этилиши режалаштирилган. НАТО 1949 йилда ташкил этилганидан буён бундай кенг қамровдаги авиамашғулотлар ўтказмаган.
АҚШ Миллий гвардияси матбуот хизмати хабарига кўра, Германия бошчилигида олиб бориладиган машғулотларда АҚШ ва Германиядан ташқари яна 22 иттифоқчи давлат иштирок этади. Манёврлар, хусусан, Чехия, Эстония, Германия ва Латвия ҳудудида ўтказилади.
Аввалроқ Сербия ҳудудида 16 июндан 30 июнга қадар АҚШ ва НАТОнинг яна ўнта давлати билан ҳамкорликда ташкил этилган Platinum Wоlf-2023 ҳарбий машғулотлари ўтказилиши хабар қилинганди.
Изоҳ (0)