Сурхондарё вилояти Денов туманида яшовчи фуқаро турмуш ўртоғининг акаси томонидан калтаклангани ҳақида хабар берилган эди. Вилоят ИИБ ҳолат юзасидан маълумот берди.
Унга кўра, ҳолат 21 апрель куни соат 17:30 ларда Денов тумани “Элобод” маҳалласида содир бўлган. Ушбу маҳаллада яшовчи Қ.Й. қариндоши Ж.М. исмли аёл билан илгаридан давом этиб келаётган оилавий низолари сабабли аёлнинг яшаш уйида ўзаро жанжаллашиб қолган. Шундан сўнг аёл танасининг турли жойларига қўллари билан уриб, тан жароҳати етказган.
Денов тумани СТЭнинг дастлабки маълумотномасига кўра, “ўртача оғир тан жароҳатлари” деб баҳоланиши кўрсатилган.
Мазкур ҳолат юзасидан Денов тумани ИИБ ҳузуридаги Тергов бўлими томонидан Жиноят кодексининг 105-моддаси 2-қисми “г” банди билан жиноят иши қўзғатилиб, тергов ҳаракатлари олиб борилмоқда. Гумонланувчи шахс Жиноят процессуал кодексининг 221-моддаси тартибида ушланган.
Тергов ҳаракатлари Сурхондарё вилояти Ички ишлар бошқармаси томонидан назоратга олинган.
Бундан олдин Самарқанд вилояти Ургут туманида 18 ёшли келин ўз жонига қасд қилгани, Фарғонада келинининг бошини узиб, дарахтга илиб кетган қайнотага ҳукм ўқилгани тўғрисида хабар берилганди.
Изоҳ (0)