“Ердаги оталар”га айланган “Осмондаги болалар”. Зулфиқор Мусоқовнинг 21 йил кутилган фильми тақдимотидан репортаж (видео)

Бундан роппа-роса 21 йил аввал катта экранларга чиқарилган “Осмондаги болалар” фильми ўз даврининг энг кассабоп фильмларидан бири бўлган. Фильмнинг иккинчи қисми суратга олиниши у қадар янгилик эмас, аммо ҳамма режиссёр ҳам учинчи қисмни суратга олишга журъат этолмайди. Зулфиқор Мусоқов кўплаб кино мухлисларининг талабига кўра “Осмондаги болалар-3“ фильмини суратга олди. 

Фильм премьерасига киноижодкорлар, санъат вакиллари ва мухлислар ташриф буюришди. 16 ёшида Жавоҳир, Лола, Хуршид, Наргиз ва Бахтиёр ролларини ижро этган ижодкорларнинг бари улғайган ва уларнинг ҳеч бири санъат соҳасида фаолият юритишмайди. 

Тақдимотдан аввал улар  “Киночилар уйи” ҳовлисидаги қизил йўлакдан ўтишди ва киноихлосмандлари билан суратга тушишди.

Фильмнинг суратга олиш ишлари 2022 йилнинг апрель ойида бошланиб, 9 ой давом этди.

— Томошабинлар “Осмондаги болалар” улғайганми, уларнинг кейинги ҳаёти қандай кечган деган саволларни кўп беришарди. Бу фильм қайсидир маънода шу саволларга жавоб бериш учун олинди. Суратга олиш ишлари нақд 9 ой давом этди. Томошабинлар севимли қаҳрамонларини соғинишганини сездим, —  дейди режиссёр Зулфиқор Мусоқов.

Фильмда асосий ролларни Темур Мусоқов, Наргиза Алимова, Даврон Ғуломов, Кристина Тоирова, Азиз Султонов каби қадрдон ижодкорлар суратга тушишган. Афсуски, улар орасида Ҳамдам ролини ижро этган актёр Музаффар Саъдуллаевни учратмадик. Бунинг сабабини режиссёр қуйидагича изоҳлади.

— Музаффар соғлиғидаги муаммолар сабаб, фильмда суратга тушолмаслигини айтди. Шу боис, ролга бошқа актёрни олдик, — дейди режиссёр.

Фильмда Хайрулла Саъдиев, Баҳром Матжонов, Карим Мирходиев, Бобур Йўлдошев, Зуҳра Ашурова, Турғун Бекназоров каби актёрлар ҳам суратга тушишди. Дилноза Кубаеванинг Ойпопук роли ҳам ўзига хослиги билан ажралиб турди. Афсуски, актриса тоби йўқлиги боис премьерада иштирок этолмади.

Фильм ҳақида ҳар бир томошабиннинг ўз субъектив фикри бор. Айримларга қаҳрамонларнинг бугунги ҳаёти ҳақидаги фильм манзур келди. Айримлар эса қадрдон қаҳрамонларини экранда учратишмаганини айтиб ўтишди. Шу боис фильмни яхши ёки ёмон дейишдан йироқмиз. Уни катта экранда томоша қилиш ва ижодкорлар меҳнатига ҳолис баҳо бериш керак.

Қуйида репортажни тўлиқ томоша қилишингиз мумкин.