Черногорияда Ўзбекистон фуқаролари учун визасиз режим жорий қилинди

Тошкент шаҳрида Ўзбекистон ва Черногория давлатлари туризм тадбиркорларининг икки томонлама очиқ мулоқоти ташкил этилди, деб хабар беради Маданият ва туризм вазирлиги.

Тадбирда қайд этилишича, 2022 йилда Ўзбекистонга ташриф буюрган хорижий туристлар сони 5,2 миллион нафарга етиб, туристик хизматлар экспорти 1,6 миллиард доллардан ошган. 2023 йилда ҳам Европадан Ўзбекистонга кириб келувчи сайёҳлар сони кескин ортиши кутилмоқда.

“Черногория давлатида юртимизнинг тарихий масканлари, бой маданий мероси ва гўзал табиати билан яқиндан танишиш мақсадида бўлганлар сони ортиб бораётганлигини қадрлаймиз ва уларни мамлакатимизда кўришдан мамнун бўламиз, – дейди Маданият ва туризм вазирининг биринчи ўринбосари Улуғбек Аъзамов.

Мутахассисларнинг сўзларига кўра, 2023 йилнинг июнь ойидан бошлаб Ўзбекистон ва Черногория ўртасида доимий тўғридан тўғри авиарейслар қатнови йўлга қўйилмоқда. Бу икки мамлакат туризм соҳасида фаолият кўрсатаётган тадбиркорлар учун янги имконият ва муҳим қулайликлар яратади.

Шунингдек, 2023 йилнинг июнь ойидан бошлаб, Черногорияга тўғридан тўғри рейслар амалга оширилади. Энди Черногорияга боришда Ўзбекистон фуқароларидан виза талаб этилмайди.

Январь ойида Henley & Partners халқаро консалтинг компанияси Халқаро ҳаво транспорти ассоциацияси маълумотларига таянган ҳолда паспортларнинг глобал рейтингини янгилаганди. 2023 йилда эса Ўзбекистон 85-ўринда қайд этилган. Март ойида эса Uzbekistan Airports Ўзбекистон фуқаролари визасиз бориши мумкин бўлган давлатлар рўйхатини эълон қилганди. Ўзбекистон фуқаролари Озарбайжонда 90 кунгача, Арманистонда 180 кунгача, Грузияда эса қарийб 1 йилгача визасиз юра олади.