Германия терма жамоаси ўз тарихидаги 1000-ўйинни Украинага қарши ўтказади. Ўйиндан тушган маблағ урушдан жабр кўрганларга хайрия қилинади

Футбол бўйича Германия ва Украина терма жамоалари ўртоқлик ўйини ўтказади.

Ҳар икки мамлакат футбол ассоциациялари мазкур ўйин бўлиб ўтишини тасдиқлади. Ўртоқлик мақомидаги хайрия ўйини 12 июнь куни Бремендаги “Везерштадион”да бўлиб ўтади. Бу Германия терма жамоаси тарихидаги 1000-ўйин ҳисобланади.

Украина футбол ассоциациясини президенти Андрей Павленконинг маълум қилишича, ўйиндан тушган маблағ Украинадаги ҳарбий ҳаракатлар оқибатида жабр кўрганларга тақдим этилади.

Халқаро майдондаги 1000-ўйин — бу тарих ва биз уни тинчлик ўйини орқали нишонламоқчимиз. Бизнинг жамоа ўз фаолияти давомида кўплаб муҳим ўйинларни ўтказган. Бу юбилейни Украина билан бирга нишонлаётганимиз ва Украина учун ўтказаётганимиздан фахрланамиз, — дейди Германия футбол федерацияси президенти Бернд Ноендорф.

Германия, шунингдек, июнь ойидаги ФИФА кунларида Польша (16 июнь) ва Колумбияга (20 июнь) қарши ўйин ўтказади.