Агар Россия президенти Владимир Путин Германияга келса, маҳаллий ҳокимият уни ҳибсга олиб, Халқаро жиноий суд вакилларига топширади. Бу ҳақда Германия адлия вазири Марко Бушманнга таяниб, Билд хабар берди.
“Халқаро жиноят суди (ХЖС) тезкорлик билан Интерпол билан боғланади ва ижрони талаб қилади. Шундан сўнг Германия Путинни ҳибсга олишга ва Германия ҳудудига кирса, уни ХЖСга топширишга мажбур бўлади”, — деди Бушманн.
У агар “Путин Германия ҳудудига қадам босса” ХЖС талабини бажаришини, чунки мамлакат суд юрисдиксиясига бўйсунишини билдирди.
Бунга жавобан Россия Тергов қўмитаси раиси Александр Бастрикин Германия адлия вазирининг Россия фуқароларининг Германияда ҳибсга олингани ҳақидаги баёнотларига ҳуқуқий баҳо беришни топширди. Украина президенти офиси раҳбари маслаҳатчиси Михаил Подоляк ҳам бунга муносабат билдирди.
“Биринчи бўлиб айнан Германия бунга қаттиқ урғу бериши рамзий маънога эга. Уларнинг юрисдиксиясида мамлакатда Путин пайдо бўлса, у украиналик болаларга нисбатан оммавий ўғирлаш ва тажовузкор зўравонликни уюштиргани учун дарҳол ҳибсга олинади”, — деди Михаил Подоляк.
Маълумот ўрнида, Германия канцлери Олаф Шольц Халқаро жиноий суд томонидан Россия президенти Владимир Путинни “қамоққа олиш ордери” чиқарилганини олқишлаган.
“Халқаро жиноий суд уруш жиноятларини тергов қилиш учун тўғри институтдир. Гап шундаки, ҳеч ким қонундан устун эмас ва бу равшан бўлиб бормоқда”, — деди сиёсатчи.
Путинни ҳибсга олиш ордери
ХЖС 17 март куни Владимир Путин ва болалар омбудсмани Мария Лвова-Беловани ҳибсга олишга ордер берди. Улар украиналик болаларни Россияга мажбуран депортация қилишда айбланмоқда.
Путин Рим статусини ратификация қилган дунёнинг 123 та давлатидан исталганида трибунал талабига биноан ҳибсга олиниши мумкин. Улар орасида Тожикистон ҳам бор.
Изоҳ (0)