Ўзбекистон табиий сув ҳавзаларида балиқ овлаш қоидалари тасдиқланиб, 2023 йил 1 июлдан бошлаб амалга киритилади. Бу ҳақда Вазирлар Маҳкамаси қарори лойиҳасида белгиланди.
Ҳужжатда қайд этилишича, балиқ овлаш билан боғлиқ қонунчилик ҳужжатларидаги мавжуд бўшлиқлар сабабли табиий сув ҳавзаларидаги балиқ ресурсларининг муҳофаза қилиниши устидан самарали назорат ўрнатиш имкониятлари чекланмоқда. Оқибатда сўнгги йилларда балиқ овлаш билан боғлиқ ҳуқуқбузарликлар сони ортиб бормоқда.
Тақиқланган балиқ овлаш қуроли ва ашёларини йўқ қилиш борасида нормаларнинг мавжуд эмаслиги оқибатида такрорий ҳуқуқбузарликлар содир этиш ҳолатлари кўпаймоқда. Табиий сув ҳавзаларидан саноат миқёсида балиқ овлаш учун тўлов миқдори, ноқонуний балиқ овлаш оқибатида етказилган зарарларни ҳисоблаш тартиблари ҳам мавжуд эмас.
Шу сабабли Ўзбекистон табиий сув ҳавзаларидан балиқ овлаш соҳасидаги муносабатларни тартибга солиш, улардаги балиқ ресурсларини муҳофаза қилиш ва браконьерлик ҳолатларининг олдини олиш учун соҳани ҳуқуқий жиҳатдан тартибга солиш заруриятини вужудга келтирмоқда.
Ҳужжатга кўра, балиқ овлаш жойларида балиқ тутиш воситалари ҳамда бошқа балиқ овлаш анжомлари ёки балиқ ови маҳсулоти билан бўлиш ҳам балиқ овлашга тенглаштирилади. Белгиланган тартибда ҳаваскорлик, спорт ва саноат мақсадида балиқ овлашга рухсат берилган Ўзбекистон ҳудудидаги барча табиий сув ҳавзалари балиқ овлаш жойлари ҳисобланади.
Қуйидагилар балиқ овлаш жойларига кирмайди:
- қўриқхоналар, табиатни муҳофаза қилиш, соғломлаштириш, рекреацион ва тарихий маданий вазифаларни бажарувчи ерлар;
- сув олиш иншоотларининг ҳимоя зоналари;
- чегара ҳудуди;
- тўғонлар, сув айиргичлар, кўприклар ва бошқа балиқчилик хўжаликлари чегараларидаги 500 метрли масофадаги муҳофаза ҳудуди;
- кўлларни ўзаро ва дарё билан бирлаштирувчи ирмоқлар ва жилғалар, дарёлар ва каналлар қуйиладиган жойлардаги 500 метр масофадаги участкалар;
- балиқ овлашга мораторий эълон қилинган ҳудудлар.
Табиий сув ҳавзаларидан балиқ тутишга квоталар ҳар йили Фанлар академиясининг зоология институти билан келишган ҳолда Табиат ресурслари вазирлиги томонидан тасдиқланади.
Белгиланишича, балиқчилик хўжалиги ташкилотлари саноат мақсадида балиқ овлашга жалб қилган барча овлаш бригадалари томонидан кунлик овланган балиқларни белгиланган намунадаги балиқларни овлаш дафтарида қайд этишга мажбур.
Балиқларни овлаш дафтари экология органларида рўйхатга олинади ва қатъий ҳисобда турадиган ҳужжат ҳисобланади. Балиқларни овлаш дафтари, махсус тамғалар учун тўловлар балиқчилик хўжалиги томонидан молиялаштирилади.
Балиқчилик хўжалиги ташкилотлари томонидан ҳар бир бригадаси бўйича балиқларни овлаш дафтари йил якуни билан экология органларига қайтарилади ҳамда камида уч йил муддат давомида сақланади.
Балиқчилик хўжалиги ташкилотлари бириктирилган сув ҳавзаси чегарасида тарози, видеофиксация билан жиҳозланган овланган балиқларни қабул қилиш пунктини ташкил этиши шарт. Қабул қилинган балиқлар ўлчовдан сўнг турларга ажратилиб, дарҳол балиқларни овлаш дафтари, юк хатида қайд этилади ва электрон шаклда “Эконазорат” ахборот тизимига киритилади.
Саноат мақсадида балиқ овлашни самарали назорат қилиш мақсадида овланган балиқ миқдори ва турлари “Эконазорат” ахборот тизими орқали шаклланадиган ва солиқ органларига интеграцияланган электрон юк хати расмийлаштириш орқали реализация қилинади.
Балиқчилик хўжалиги ташкилотларига табиий сув ҳавзаларидан саноат мақсадида балиқ овлаш учун квота (рухсатнома) ҳам Табиат ресурслари вазирлиги томонидан берилади.
Изоҳ (0)