Хитой “Вагнер” хусусий ҳарбий компаниясининг (Россияга тегишли) 2023 йил бошида қурол ва ўқ-дориларни етказиб бериш бўйича сўровини жавобсиз қолдирди. Бу ҳақда Financial Times газетаси АҚШ разведка хизматларининг сиздирилган махфий материалларига таяниб, хабар берди.
“‘Вагнер гуруҳи’нинг Хитойга тўғридан тўғри сўрови улар Пекин Москвага қурол етказиб беришга ва Хитой корхоналари ҳарбий кампанияни (Россиянинг Украинадаги — таҳр.) қўллаб-қувватлашнинг бошқа, жиддий бўлмаган шаклидан ташқарига чиқишга очиқ бўлишига ишончи бўлганини кўрсатади”, — дейилади хабарда.
Шу билан бирга, АҚШ разведкаси ҳисоботига кўра, январь ойи бошида Хитой “Вагнер” ХҲКга ҳатто синов учун ҳам ҳеч қандай қурол юбормаган ва қурол-яроғ етказиб бериш бўйича мазкур ташкилот билан боғланмаган.
Вашингтон аввалроқ Пекин муҳим ўқ-дорилар, артиллерия снарядлари ва ракета захираларини тўлдириш учун Россияни қуроллар билан таъминлаш имкониятини кўриб чиқаётганини, бироқ Хитойнинг Россияга бундай ёрдам кўрсатганига ҳеч қандай далил йўқлигини таъкидлаган эди.
Хитой томони Россияга қурол етказиб бериш режалари борлигини бир неча бор рад этиб, НАТОни Украинага ёрдам кўрсатиш орқали можарони қўзғатаётганликда айблаган.
АҚШ махсус хизматларининг махфий маълумотларда келтирилишича, Россиянинг бошқа икки яқин иттифоқчиси — Беларусь ва Сурия Москванинг қуролларни сотиш бўйича сўровларини қаноатлантирган. Шунингдек, ҳужжатда “Вагнер” Туркия билан қурол-яроғ савдоси бўйича алоқа қилгани келтирилади.
Изоҳ (0)