Германияда 21 апрель ҳолатига кўра EVG темир йўллар ва транспорт ходимлари касаба уюшмаси томонидан эълон қилинган иш ташлашлар сабаб поездлар ҳаракати деярли фалажланди, деб хабар беради Deutsche Welle.
Маълум қилинишича, меҳнат шароитини яхшилаш борасидаги курашга соат 03:00 дан бошлаб мамлакатдаги 50 га яқин темир йўл компанияларининг ходимлари қўшилган.
Deutsche Баҳн темир йўл компанияси поездлар ҳаракатида кечга қадар узилишлар бўлиши мумкинлигидан огоҳлантирган. Хизмат кўрсатиш соҳасидаги Ver.di касаба уюшмаси бўлса куни кеча Гамбург, Кельн/Бонн ва Дюссельдорф аэропортларида бошланган иш ташлашларни давом эттирмоқда, 21 апрелдан уларга Штутгарт ва Карлсруэ/Баден-Баден аэропортлари ҳам қўшилган.
Касаба уюшмачларининг талаби
EVG иттифоқи немис темир йўл ходимларининг маошини 12 фоизга, бироқ ойига 650 евродан кам бўлмаган миқдорга оширишни талаб қилмоқда. Ver.di бўлса тунги вақтда, дам олиш ва байрам кунлари ишлайдиган аэропорт ходимларининг устамасини оширишни сўраяпти. 11, 12 апрель кунлари ўтказилган музокаралар натижасида келишувга эришилмаган, кейинг раундни 27–28 апрель кунлари ўтказиш режа қилинмоқда.
Германия транспорт соҳаси ходимларининг охирги энг йирик иш ташлашлари март охирларида содир бўлган. Касаба уюшмалари томонидан ташкил этилган бу каби норозиликлар деярли доим олдиндан эълон қилинади — немис қонунчилигига кўра, бу ишга кеч қолиш ёки келмаслик учун асос бўла олмайди.
Декабрь ойида Американинг The New York Times газетасида ишловчи 1 000 дан ортиқ ходим 40 йил ичида биринчи марта 24 соатлик иш ташлаш эълон қилганди. Ходимлар иш ҳақини ошириш ва масофадан туриб ишлаш имкониятини кенгайтиришни талаб қилган.
Изоҳ (1)
не открывается