Каталония ҳукумати “Реал”дан “Барселона”нинг Франко режимига алоқадорлиги ҳақидаги видеосини ўчиришини ва узр сўрашини талаб қилмоқда

Каталония ҳукумати “Барселона”нинг Франко режими билан алоқаси ҳақидаги хабарларни сохта деб атади.

Эслатиб ўтамиз, аввалроқ “Барселона” президенти Хоан Лапорта “Реал”нинг “Негрейра иши”даги иштироки ҳақида гапирганди: “Режим жамоаси ҳисобланган клуб ўзини бепарво ҳис қилмоқда. 70 йил давомида CТА президентларининг аксарияти Мадрид билан боғланганди”. Шунингдек, Лапорта ҳакамлар мадридликларга тизимли равишда ёрдам беришларига шаъма қилганди.

“Қаймоқранглилар”нинг шахсий канали Real Madrid TV да “Ҳақиқатан ҳам ҳукмрон режимнинг клуби ким эди?” сарлавҳали видеоролиги эфирга кетди. Унда Франциско Франко ҳукмронлиги даври билан боғлиқ фактлар санаб ўтилди: “У клубни уч марта инқироздан сақлаб қолган, жамоанинг мухлиси эди, унинг вазири “Камп Ноу”ни очганди. Франко қўл остида каталонияликлар 8 марта Ла Лигани қўлга киритганди”.

El Pais нашрининг хабарига кўра, Каталония ҳукумати матбуот котиби Патрисия Плаха “Реал” “қизил чизиқни кесиб ўтганини” таъкидлаб, видеони ўчиришини сўраган. Жамоадан эса узр сўрашни талаб қилган. 

““Реал” каби ташкилотлар учун сохта хабарлар тарқатиш ноўрин ва масъулиятсизликдир. Каталония ҳукумати Франко режими остида жабр кўрган минглаб одамларга ҳурматсизлик сифатида чиқарилган видеони омма олдида қораламоқчи”, — дейилади баёнотда.