Қашқадарё вилоятининг Миришкор туманида руҳий касалликлар диспансери бош шифокори қўлга олинди.
Маълум қилинишича, ДХХ ва Бош прокуратура ҳузуридаги департамент ходимлари ҳамкорликда тезкор тадбир ўтказган. Тадбирда Қашқадарё вилояти 1-сонли асаб-руҳий касалликлар диспансери бош шифокори вазифасини бажарувчи ва врачлар маслаҳати комиссияси раиси лавозимида ишловчи У.И. ушланган.
Аниқланишича, у фуқаролардан бирини диспансерда ётиб даволангани тўғрисида касаллик тарихини тўлдирган ва уни руҳий касал сифатида рўйхатга қўйган. Унинг руҳий ҳолатида ўзгариш бўлгани сабабли меҳнатга лаёқатсизлиги ҳақида хулоса бериш эвазига қарийб 400 доллар беришни талаб қилган.
Аслида фуқаро диспансерга келмаган бўлса ҳам шифокор расмий ҳужжатларни қалбакилаштириб, хизмат хонасида ишлов берилган 4,3 миллион сўм пулларни олаётган вақтида қўлга олинган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
2022 йил декабрда Қашқадарё вилоятининг Қарши туманида тиббиёт бирлашма бош шифокори 500 доллар пора билан қўлга тушгани тўғрисида хабар берилганди. Шунингдек, август ойида Андижон вилоятининг Жалақудуқ туманида пора эвазига ҳамшираликка ишга киритиб қўймоқчи бўлган шахс ушланган эди.
Изоҳ (0)