Самарқанд вилоятида ишқий муносабатда бўлиб келган эркакдан пул ундирмоқчи бўлган аёл қўлга олинди, деб хабар беради ИИВ матбуот хизмати.
Қайд этилишича, 31 ёшли аёл 33 ёшли пастдарғомлик эркакдан товламачилик йўли билан пул талаб қилган. Эркак 2022 йил февраль ойида аёлнинг яшаш хонадонига дори олиб бориб берган вақтида танишиб қолган. У билан яқин алоқада бўлиб келган ва 2022 йил август ойларида муносабатлар узилиб, учрашувлар тўхтаган. Ўтган йилнинг декабрь ойида аёл эркакка тез-тез қўнғироқ қилиб, у билан бирга бўлган вақтларидаги расмлар ва видеолари борлигини айтиб, ушбу видео ва расмларни, қолаверса, у билан бўлган ёзишмаларни оиласига кўрсатиши билан қўрқитган.
2023 йил март ойида айтилган пулларни бермаса ҳаммасини унинг оиласига кўрсатиб, оиласини бузиш билан бир неча бор таҳдид қилган ва эвазига 15 минг доллар миқдорида пул талаб қилган.
Мазкур ҳолат юзасидан 11 апрель куни Самарқанд вилоят ИИБ ТҚХ ЖҚБ ходимлари томонидан Самарқанд шаҳар Али Қушчи кўчасида ўтказилган тезкор тадбир давомида гумонланувчи ариза муаллифидан 6 минг доллар миқдоридаги пулларни олаётган вақтда далилий ашёлар билан қўлга олинган.
Ҳолат юзасидан Жиноят кодексининг тегишли моддаларига асосан жиноят иши қўзғатилиб, ҳозирда тергов ҳаракатлари олиб борилмоқда.
Ўзбекистонда ўзганинг яланғоч фото ёки видеоларини тарқатиш билан қўрқитганлик учун жавобгарлик қандай?
Президент томонидан 11 апрель куни “Хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун қабул қилинган.
Қонун билан интим ҳаёт дахлсизлигини бузганлик учун жиноий жавобгарлик белгиланган, яъни Жиноят кодекси қуйидаги мазмундаги 141-3-модда билан тўлдирилган:
“Шахснинг розилигисиз унинг танасининг ва (ёки) жинсий аъзоларининг яланғоч ҳолдаги фото ёки видеотасвирини ўз ичига олган маълумотларни тарқатиш, шу жумладан оммавий ахборот воситаларида, телекоммуникация тармоқларида ёки интернет жаҳон ахборот тармоғида тарқатиш ёки бундай маълумотларни тарқатиш билан қўрқитиш — базавий ҳисоблаш миқдорининг 400 бараваридан 600 бараваригача (120 миллион сўмдан 180 миллион сўмгача) миқдорда жарима ёки 360 соатгача мажбурий жамоат ишлари ёхуд уч йилгача ахлоқ тузатиш ишлари билан жазоланади.
Ўша ҳаракатлар:
а) такроран ёки хавфли рецидивист томонидан;
б) бир гуруҳ шахслар томонидан олдиндан тил бириктириб;
в) вояга етмаган шахсга нисбатан содир этилган бўлса
360 соатдан 480 соатгача мажбурий жамоат ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади”.
Изоҳ (0)