Ўзбекистонда хизмат кўрсатган журналист, Ўзбекистон Ёзувчилар уюшмаси аъзоси Мурод Хидир 17 апрель куни 84 ёшида вафот этди. Бу ҳақда уюшма матбуот хизмати хабар берди.
Мурод Хидир 1939 йилда Қашқадарё вилояти Китоб тумани Олақўйлиқ қишлоғида туғилган. 1962 йилда Самарқанд давлат университетининг филология факультетини тамомлаган. У “Қашқадарё ҳақиқати” ва “Келажак тонги” газеталаридаги публицистик мақолалари билан элга танилган. “Гулистон”, “Шарқ юлдузи” ва “Санъат” журналларида ҳам фаолият юритган. “Сирли олам” журнали, “Қалб кўзгуси” ва “Соҳибқирон юлдузи” газеталарида бош муҳаррирлик вазифасини бажарган.
Шунингдек, Ўзбекистон Ёзувчилар уюшмасида турли лавозимларда ишлаган. Мурод Хидир “Қирғоқлар”, “Аму соҳиллар бўйлаб”, “Кўзача ва бўтача”, “Тошкўл”, “Кийикча ва бўйноқ”, “Ҳарф ўйини” каби китоблар муаллифи саналади.
Апрель бошларида Ўзбекистон телевидениесининг таниқли журналисти Соҳибжон Алижонов 55 ёшида, 2022 йил 17 январь куни Ўзбекистонда хизмат кўрсатган журналист, “Меҳнат шуҳрати” ордени соҳиби Дилбар Маҳмудова 85 ёшида, Ўзбекистонда хизмат кўрсатган журналист Рустам Обидов эса 72 ёшида Қариялар уйида вафот этганди.
Изоҳ (0)