Баъзи ичимликлар терини парвариш қилишга мўлжалланган махсус маҳсулотлар каби шиш билан курашади. Ҳар бир аёл ҳаётида камида бир марта у ёки бу ерининг шишиб қолишига дуч келган. Масалан, кўзлар остида доиралар, шишган юз, пошнали оёқ кийимни кийиш ёки узоқ вақт бир жойда туриш туфайли тўпиқларнинг шишиши кузатилади. Қуйида мутахассис билан биргаликда қайси ичимликлар бу муаммони тез ва осон ҳал қилишда ёрдам беришини аниқлаймиз.
Танадаги суюқликни ушлаб туриш учун пайдо бўладиган шишнинг сабаблари хилма-хилдир. Улар лимфа ва қон айланиш тизимларининг иши бузилган жойларда пайдо бўлади. Шу билан бирга шиш микроэлементларнинг номутаносиблигини келтириб чиқарадиган овқатланиш бўйича йўл қўйилган хатолар, тана ички муҳитининг кислоталаниши, суюқликнинг чиқиши бузилиши ва танадаги жиддий носозликлар билан боғлиқ бўлиши эҳтимоли йўқ эмас.
Оёқнинг пастки қисми ва тўпиқларнинг шишиши буйрак, юрак, гормонал касалликлар, варикоз томирларининг дисфункцияси ҳақида сигнал бўлиши мумкин. Агар кўзлар мунтазам равишда шишиб қолса, бу буйрак ёки юракнинг нотўғри ишлаётганидан ёки катта эҳтимол билан қалқонсимон без функцияси бузилган деб тахмин қилса бўлади. Юқоридаги барча ҳолатлар шифокорлар — эндокринолог, кардиолог ва терапевт билан маслаҳатлашишни талаб қилади.
Шиш пайдо бўлишининг асосий сабабчилари кўпинча овқатланиш ва суюқлик ичиш режимининг хусусиятларига боғлиқ жараён. Менюни ўзгартириш ва унга суюқликни ушлаб туришга ёрдам берадиган ичимликлар қўшиш орқали муаммони ҳал қилишнинг имкони бор. Келинг, самарали эканлиги исботланган вариантларни кўриб чиқамиз.
Лимон суви қўшилган ичимлик
Лимон нордон таъмга эга бўлишига қарамай, у ишқорий маҳсулотларга тегишли. Чунки унинг таркибида 8 дан ортиқ органик кислоталар мавжуд. Бундай ичимлик нафақат ортиқча суюқликни, балки токсинларни ҳам чиқариб юборишга ёрдам беради. Тайёрланиши осон: 250 мл илиқ сувга 2 ош қошиқ лимон шарбати аралаштирилади. Шишганлик йўқолгунча кунига бир марта ичиш тавсия этилади.
Петрушка чойи
Юздаги, балки танадаги шишдан тезда халос бўлишга ёрдам берадиган ажойиб диуретик. Чой тайёрлаш учун 2 ош қошиқ қуритилган ёки барра кўкатни бир стакан қайноқ сув билан аралаштириб, уни 10 дақиқага қолдиринг. Бу чойни кунига уч мартагача истеъмол қилиш мумкин.
Кўк чой
Кўпчиликка таниш бўлган бу ичимлик организмдаги ортиқча суюқликни секинлик билан чиқариб юборади, шу билан бирга танага керакли минералларни сақлаб қолади. Сиз уни хоҳлаганча ва исталган миқдорда, салбий оқибатлардан қўрқмасдан ичсангиз бўлаверади.
Арпабодиён қайнатмаси
Арпабодиён уруғлари меъёрдан ортиқ бўлган натрийни ҳам, ортиқча сувни ҳам йўқ қилишга ёрдам беради. Бундан ташқари, улар метеоризмга қарши курашади. Дамламани тайёрлаш учун 1 ош қошиқ уруғни бир стакан иссиқ сув билан аралаштириб, уни 5-10 дақиқага қолдиринг, кейин сузинг. Шишиш камайгунча кунига уч марта ичинг.
Клюква шарбати
Ушбу резавордан қилинган нафақат мевали ичимлик ёки шарбат, балки унинг баргларидан тайёрланган дамлама ҳам ортиқча суюқлик билан яхши курашади. Мевали ичимликларни шакарсиз тайёрлаш лозим — 1 грамм оддий углеводлар 4 грамм сувни сақлайди. Баргларини оддий чой каби дамласа бўлади. Бундай дамламалар ҳеч қандай қарши кўрсатмага эга эмас, ҳатто, ҳомиладор аёллар ва болаларга ҳам буюрилиши мумкин.
Сабзи шарбати
Сабзи ишқорий таъсирга эга. Унинг шарбати шишни мунтазам равишда бошдан кечирадиганлар рационига ажойиб қўшимча ҳисобланади. Уни асосий овқатлар орасида газак сифатида ичиш тавсия этилади.
Овсянка кисели
Бу ичимлик ҳам шиш билан курашади. Унинг диуретик таъсири ушбу ичимликда кремний мавжудлиги билан боғлиқ. Бундан ташқари, у ошқозон-ичак шиллиқ қавати ҳолатини яхшилайди. Овсянка кисели крахмал ёки шакар қўшмасдан тайёрланади.
Қайин дарахти шарбати
Енгил диуретик таъсири туфайли шишни йўқ қилади. Шу билан бирга бу суюқлик организмдаги сув-туз балансини бузмайди, чунки у магний ва калийни ўз ичига олади. Ишқорий pH га эга, бунинг натижасида сийдик тизимидаги тошлар ва қумларни парчалаш мумкин. Катта тошлар (агар мавжуд бўлса)нинг ҳаракатланишига йўл қўймаслик учун бу ичимликни меъёрида ичинг.
Қора қаҳва
Ортиқча суюқликдан халос бўлишга ёрдам берадиган қаҳва фақат бир қатор ён таъсирга эга. Хусусан, у организмдан калсий ва калийни ҳам чиқариб юборади. Шунингдек, бу ичимлик юрак-қон томир касалликлари ёки ошқозон-ичак тракти билан боғлиқ муаммоларга дучор бўлган одамларнинг рационига мос келмайди.
Бодринг суви
Ушбу ичимликнинг кўплаб фитнес марказлари ва курортларда тайёрланиши бежиз эмас. Бодринг таркибида кремний миқдори кўп бўлгани учун организмдан сувни чиқариб юборади. Бодринг суви метаболизмни ва токсинларни йўқ қилишни рағбатлантиради, шунингдек, чанқоқни мукаммал даражада қондиради. Уни тайёрлаш учун 1 дона ўрта катталикдаги тозаланган ва майда тўғралган бодрингни 2 литр сув билан аралаштиринг. Ичимликни бир кеча мобайнида музлатгичга қўйинг. Кун давомида бодринг сувини ичишингиз мумкин.
Изоҳ (0)