Ba’zi ichimliklar terini parvarish qilishga mo‘ljallangan maxsus mahsulotlar kabi shish bilan kurashadi. Har bir ayol hayotida kamida bir marta u yoki bu yerining shishib qolishiga duch kelgan. Masalan, ko‘zlar ostida doiralar, shishgan yuz, poshnali oyoq kiyimni kiyish yoki uzoq vaqt bir joyda turish tufayli to‘piqlarning shishishi kuzatiladi. Quyida mutaxassis bilan birgalikda qaysi ichimliklar bu muammoni tez va oson hal qilishda yordam berishini aniqlaymiz.
Tanadagi suyuqlikni ushlab turish uchun paydo bo‘ladigan shishning sabablari xilma-xildir. Ular limfa va qon aylanish tizimlarining ishi buzilgan joylarda paydo bo‘ladi. Shu bilan birga shish mikroelementlarning nomutanosibligini keltirib chiqaradigan ovqatlanish bo‘yicha yo‘l qo‘yilgan xatolar, tana ichki muhitining kislotalanishi, suyuqlikning chiqishi buzilishi va tanadagi jiddiy nosozliklar bilan bog‘liq bo‘lishi ehtimoli yo‘q emas.
Oyoqning pastki qismi va to‘piqlarning shishishi buyrak, yurak, gormonal kasalliklar, varikoz tomirlarining disfunksiyasi haqida signal bo‘lishi mumkin. Agar ko‘zlar muntazam ravishda shishib qolsa, bu buyrak yoki yurakning noto‘g‘ri ishlayotganidan yoki katta ehtimol bilan qalqonsimon bez funksiyasi buzilgan deb taxmin qilsa bo‘ladi. Yuqoridagi barcha holatlar shifokorlar — endokrinolog, kardiolog va terapevt bilan maslahatlashishni talab qiladi.
Shish paydo bo‘lishining asosiy sababchilari ko‘pincha ovqatlanish va suyuqlik ichish rejimining xususiyatlariga bog‘liq jarayon. Menyuni o‘zgartirish va unga suyuqlikni ushlab turishga yordam beradigan ichimliklar qo‘shish orqali muammoni hal qilishning imkoni bor. Keling, samarali ekanligi isbotlangan variantlarni ko‘rib chiqamiz.
Limon suvi qo‘shilgan ichimlik
Limon nordon ta’mga ega bo‘lishiga qaramay, u ishqoriy mahsulotlarga tegishli. Chunki uning tarkibida 8 dan ortiq organik kislotalar mavjud. Bunday ichimlik nafaqat ortiqcha suyuqlikni, balki toksinlarni ham chiqarib yuborishga yordam beradi. Tayyorlanishi oson: 250 ml iliq suvga 2 osh qoshiq limon sharbati aralashtiriladi. Shishganlik yo‘qolguncha kuniga bir marta ichish tavsiya etiladi.
Petrushka choyi
Yuzdagi, balki tanadagi shishdan tezda xalos bo‘lishga yordam beradigan ajoyib diuretik. Choy tayyorlash uchun 2 osh qoshiq quritilgan yoki barra ko‘katni bir stakan qaynoq suv bilan aralashtirib, uni 10 daqiqaga qoldiring. Bu choyni kuniga uch martagacha iste’mol qilish mumkin.
Ko‘k choy
Ko‘pchilikka tanish bo‘lgan bu ichimlik organizmdagi ortiqcha suyuqlikni sekinlik bilan chiqarib yuboradi, shu bilan birga tanaga kerakli minerallarni saqlab qoladi. Siz uni xohlagancha va istalgan miqdorda, salbiy oqibatlardan qo‘rqmasdan ichsangiz bo‘laveradi.
Arpabodiyon qaynatmasi
Arpabodiyon urug‘lari me’yordan ortiq bo‘lgan natriyni ham, ortiqcha suvni ham yo‘q qilishga yordam beradi. Bundan tashqari, ular meteorizmga qarshi kurashadi. Damlamani tayyorlash uchun 1 osh qoshiq urug‘ni bir stakan issiq suv bilan aralashtirib, uni 5-10 daqiqaga qoldiring, keyin suzing. Shishish kamayguncha kuniga uch marta iching.
Klyukva sharbati
Ushbu rezavordan qilingan nafaqat mevali ichimlik yoki sharbat, balki uning barglaridan tayyorlangan damlama ham ortiqcha suyuqlik bilan yaxshi kurashadi. Mevali ichimliklarni shakarsiz tayyorlash lozim — 1 gramm oddiy uglevodlar 4 gramm suvni saqlaydi. Barglarini oddiy choy kabi damlasa bo‘ladi. Bunday damlamalar hech qanday qarshi ko‘rsatmaga ega emas, hatto, homilador ayollar va bolalarga ham buyurilishi mumkin.
Sabzi sharbati
Sabzi ishqoriy ta’sirga ega. Uning sharbati shishni muntazam ravishda boshdan kechiradiganlar ratsioniga ajoyib qo‘shimcha hisoblanadi. Uni asosiy ovqatlar orasida gazak sifatida ichish tavsiya etiladi.
Ovsyanka kiseli
Bu ichimlik ham shish bilan kurashadi. Uning diuretik ta’siri ushbu ichimlikda kremniy mavjudligi bilan bog‘liq. Bundan tashqari, u oshqozon-ichak shilliq qavati holatini yaxshilaydi. Ovsyanka kiseli kraxmal yoki shakar qo‘shmasdan tayyorlanadi.
Qayin daraxti sharbati
Yengil diuretik ta’siri tufayli shishni yo‘q qiladi. Shu bilan birga bu suyuqlik organizmdagi suv-tuz balansini buzmaydi, chunki u magniy va kaliyni o‘z ichiga oladi. Ishqoriy pH ga ega, buning natijasida siydik tizimidagi toshlar va qumlarni parchalash mumkin. Katta toshlar (agar mavjud bo‘lsa)ning harakatlanishiga yo‘l qo‘ymaslik uchun bu ichimlikni me’yorida iching.
Qora qahva
Ortiqcha suyuqlikdan xalos bo‘lishga yordam beradigan qahva faqat bir qator yon ta’sirga ega. Xususan, u organizmdan kalsiy va kaliyni ham chiqarib yuboradi. Shuningdek, bu ichimlik yurak-qon tomir kasalliklari yoki oshqozon-ichak trakti bilan bog‘liq muammolarga duchor bo‘lgan odamlarning ratsioniga mos kelmaydi.
Bodring suvi
Ushbu ichimlikning ko‘plab fitnes markazlari va kurortlarda tayyorlanishi bejiz emas. Bodring tarkibida kremniy miqdori ko‘p bo‘lgani uchun organizmdan suvni chiqarib yuboradi. Bodring suvi metabolizmni va toksinlarni yo‘q qilishni rag‘batlantiradi, shuningdek, chanqoqni mukammal darajada qondiradi. Uni tayyorlash uchun 1 dona o‘rta kattalikdagi tozalangan va mayda to‘g‘ralgan bodringni 2 litr suv bilan aralashtiring. Ichimlikni bir kecha mobaynida muzlatgichga qo‘ying. Kun davomida bodring suvini ichishingiz mumkin.
Izoh (0)