Фарғона вилояти Ўзбекистон туманида ер назорати инспектори лавозимида ишловчи шахс пора олаётган вақтида ушланди. Бу ҳақда “Менинг юртим” телекенали орқали узатилган лавҳада маълум қилинди.
Қайд этилишича, Ўзбекистон тумани ҳокимлиги Қишлоқ хўжалиги бўлими ер назорати инспектори 10 нафар фуқарога қишлоқ хўжалиги маҳсулотлари учун 3 гектар ерни очиқ электрон танловда ютиб бериш эвазига 4 минг АҚШ доллари сўраб келаётгани аниқланган.
Фарғона вилояти ИИБ ҳамда Бош прокуратура ҳузуридаги департаментнинг вилоят бўлими ходимлари ҳамкорлигида ўтказилган тезкор тадбирда Яйпан шаҳарчаси марказида жойлашган савдо маркази ёнида инспектор аризачидан 10 дона фуқаролик паспорти ва 4 минг АҚШ доллари олаётганида қўлга олинди.
Ҳозирда ҳолат юзасидан терговга қадар текширув ҳаракатлари олиб борилмоқда.
Ер олиб беришга оид ҳолатлар
Апрель бошида Сирдарёда ўзганинг 5 сотих ерини 7,4 минг АҚШ долларига сотишга уринган шахс ушланган эди. Шунингдек, Бухорода ҳокимлик захирасидаги 10 сотих ерни сотишга уринган шахс қўлга олингани, Тошкент вилоятида ғишт заводини аукционда арзон нархга олиб беришни ваъда қилган шахслар ушлангани, Қашқадарёда икки нафар ҳоким ёрдамчисига нисбатан жиноят иши қўзғатилгани тўғрисида хабар берилганди.
Изоҳ (0)