Олий таълим, фан ва инновациялар вазирлиги “Академик лицейларга ўқувчиларни ўқишга қабул қилиш, ўқишини кўчириш, қайта тиклаш ва ўқишдан четлатиш тартибини такомиллаштириш ҳақида”ги Вазирлар Маҳкамаси қарори лойиҳасини муҳокамага қўйди.
Унга кўра:
- абитуриентларга рўйхатдан ўтишда учтагача академик лицейнинг таълим тили бир хил бўлган биттадан мос йўналишини танлаш имконияти берилади;
- абитуриент ўзи танлаган ҳудудда (Қорақалпоғистон Республикаси, вилоятлар маркази ёки Тошкент шаҳрида) ташкил этиладиган кириш тест синовларида иштирок этади.
Бундан ташқари, академик лицейларга ўқишга қабул қилишда халқаро ва республика фан олимпиадалари ғолиблари, хорижий тил сертификати мавжуд абитуриентларга имтиёзлар берилади.
Шунингдек, қарор билан тасдиқланиши назарда тутилган низомга кўра:
- академик лицейларга умумий ўрта таълим мактабларининг 9-синф битирувчиларини танлаб олиш, ўқишга қабул қилиш тартиби;
- академик лицейларда маслаҳат кенгашлари фаолиятини ташкил этиш, ҳужжатларни қабул қилиш, имтиҳонларни ўтказиш, расмийлаштириш ва натижаларни эълон қилиш тартиби;
- фан олимпиадалари, танлов ғолиблари ва умумтаълим фанларини ўзлаштириш сертификатига эга бўлганлар учун имтиёзларни қўллаш;
- академик лицей ўқувчиларининг ўқишини кўчириш, қайта тиклаш ва ўқишдан четлатиш тартиби белгиланади.
2022 йил сентябрда Таълим инспекцияси томонидан мамлакатдаги битирувчиси мавжуд бўлган 65 та академик лицей фаолияти самарадорлиги таҳлил қилиниб, таълим сифати бўйича миллий рейтин тайёрланганди. Ўшанда ОТМларга қабул қилинган ўқувчилар улуши бўйича етакчи ўринларни “Тошкент ирригация ва қишлоқ хўжалигини механизациялаш муҳандислари институти” Миллий тадқиқот университетининг “International house Tashkent" академик лицейи, Бухоро давлат университети академик лицейи ҳамда Тошкент педиатрия тиббиёт институти академик лицейи эгаллаган эди.
Изоҳ (0)