“Очиқ бюджет” ахборот порталида “Менинг йўлим” лойиҳасининг 2023 йилги мавсумига 17 апрелдан старт берилди. Бу ҳақда Иқтисодиёт ва молия вазирлиги хабар берди.
Туман (шаҳар) бюджетларида ҳудудий ички йўлларни таъмирлаш учун режалаштирилган маблағларнинг камида 50 фоиз қисмини фуқаролар фикри асосида йўналтиришини таъминлаш мақсадида ташкил этилган “Менинг йўлим” лойиҳасининг жорий йилги мавсуми учун 312 миллиард сўмдан ортиқ маблағлар йўналтирилиши режалаштирилган.
Лойиҳа доирасида таклиф киритиш жараёни 27 апрель санасига қадар давом этади. Киритилган таклифлар учун овоз бериш жараёнлари 28 апрелдан 7 майга қадар ўтказилади.
“Менинг йўлим” лойиҳаси нима?
Вазирлар Маҳкамасининиг 2022 йил 2 февралда “Автомобиль йўллари соҳасида очиқлик стандартларини жорий этиш ва соҳада жамоатчилик назоратини кучайтириш чора-тадбирлари тўғрисида”ги 49-сонли қарори қабул қилинган.
Мазкур қарорга асосан бюджет маблағлари сарфланишида фуқаролар иштирокини янада ошириш ва мамлакатдаги мавжуд ички йўллар сифатини яхшилаш мақсадида 2022 йилдан бошлаб туман ва шаҳарлар бюджетлари параметрларида ҳудудий ички йўлларни таъмирлаш учун ажратиладиган маблағларнинг 50 фоизи “Очиқ бюджет” ахборот портали орқали жамоатчилик фикри асосида аниқланган ички йўлларни таъмирлашга йўналтирилиши қатъий белгилаб қўйилган. Бу тизим “Ташаббусли бюджет” жараёнларидан фарқли ўлароқ бир йилда бир маротаба ўтказилади.
Ушбу жараёнлар бевосита “Очиқ бюджет” ахборот портали орқали амалга оширилади, бунда, ахборот порталига ички йўлларнинг жойлашган манзили (геопозицияси), тўлиқ номлари, узунлиги, ҳолати (асфалтланган, таъмирталаб) ва бошқа маълумотлари тўлиқ киритилади ҳамда фуқаролар ички йўллар реестридан геомаълумотлар асосида тегишли ички йўлни танлаш орқали ўз таклифларини қолдириш имкониятига эга бўлади.
Таклиф қолдириш механизми:
Ахборот портали автоматик равишда таъмирлашга доир ўртача нархни ва туман (шаҳар) бюджети параметрларидан келиб чиқиб, ҳар бир туман (шаҳар) бўйича таъмирланадиган ички йўлларнинг умумий ҳажмини аниқлайди. Ахборот портали орқали жамоатчилик фикри асосида ички йўлларни таъмирлашда таклифларни шакллантириш тартиби қуйидагича:
- Ахборот портали орқали жамоатчилик фикри бевосита фуқаролар томонидан билдирилган таклифлар асосида шакллантирилади;
- Ахборот портали орқали таклифларни юбориш ҳамда овоз бериш жараёнида фақатгина вояга етган фуқаролар иштирок этишлари мумкин;
- Фуқаролар ҳар йили ички йўлларни таъмирлашга фақат битта таклифни илгари суриши ҳамда битта таклифга овоз бериши мумкин. Фуқаролар ўзлари томонидан киритилган таклифга овоз бериши тақиқланади;
- Ички йўлларни таъмирлашга доир таклифлар киритиш фуқаролар томонидан ахборот порталида тақдим этилган Ички йўллар реестридаги тегишли ички йўллардан бирини танлаш орқали амалга оширилади;
- Ахборот порталида таклиф киритиш бевосита порталда рўйхатдан ўтиш орқали амалга оширилади;
- Ҳар бир туман ва шаҳарларда билдирилган таклифлар бўйича берилган энг кўп овозлар сонидан келиб чиқиб, юқоридан пастга қараб сараланади.
Март ўрталарида “Ташаббусли бюджет” лойиҳасининг навбатдаги мавсуми бошланишидан олдин Иқтисодиёт ва молия вазирлиги мутасаддилари билан матбуот анжумани ташкил этилганди. Ўшанда “Очиқ бюджет” ахборот портали орқали овоз бериш тизимини такомиллаштиришга қаратилган янги механизм ишга туширилгани айтилган. 2023 йилги туман ва шаҳар бюджетларида ташаббусли бюджет жараёнлари учун жами 2 триллион сўм маблағ йўналтириш кўзда тутилган бўлиб, шундан 1 триллион сўми биринчи мавсумда ажратилади.
Изоҳ (0)