“Вақф” фондига рамазон ойи бошидан бери 1 млрд сўмдан ортиқ маблағ қабул қилинди

Рамазон ойи бошидан ҳозирга қадар “Вақф” хайрия жамоат фондига 1 миллиард 238 миллион 460 минг сўмдан ортиқ маблағ қабул қилинди. Бу ҳақда брифингда фонд раҳбари маълум қилди.

Ўтган ҳафта давомида республика бўйлаб 393 та оилага 69 миллион 90 минг сўмлик озиқ-овқат маҳсулотлари, моддий кўмакка муҳтож 48 нафар фуқарога 56 миллион 300 минг сўмлик пул маблағлари ҳамда 910 нафардан ортиқ фуқаролар учун ифторлик дастурхонлари ёзилди.

Рамазон ойининг учинчи ҳафтаси давомида фонд томонидан аҳолининг ижтимоий кўмакка муҳтож қатлами, диний соҳа ходимлари ҳамда диний таълим муассасалари талабалари учун 382 миллион 100 минг сўмлик хайрия ишлари амалга оширилди.

Умумий ҳисобда рамазон ойи бошидан бугунга қадар 1 025 та оилага 178 миллион 820 минг сўмлик озиқ-овқат маҳсулотлари, 97 нафар фуқарога 123 миллион 900 минг сўмлик пул маблағлари хайрия қилиниб, 2 110 нафардан ортиқ фуқаролар учун ифторлик дастурхонлари ёзилди. Ой давомида жами 715 миллион 930 минг сўмлик хайрия ишлари амалга оширилди.