Ўзбекистондан Қозоғистонга экспорт қилинган помидорларда хавфли вирус аниқлангани ҳақида хабарлар тарқалди. Қишлоқ хўжалиги вазирлиги ҳолат юзасидан муносабат билдирди.
Ўсимликлар карантини ва ҳимояси агентлиги томонидан ҳолатга аниқлик киритиш мақсадида дастлабки тезкор суриштирув ва ўрганишлар олиб борилган. Натижаларга кўра, Қозоғистон томони Ўзбекистондан импорт бўлган помидор маҳсулотларида помидор жигарранг вируси ва бошқа карантин касалликлар аниқлангани юзасидан маҳсулотларни орқага қайтариш ҳолати кузатилмаган ва эътирознома жўнатмаган.
Шу билан бирга, Ўзбекистон ва Қозоғистон карантин хизматлари билан тезкор равишда музокара олиб борилиб, ушбу тарқалган хабарга изоҳ берган фитосанитария хизматининг Туркистон вилояти ҳудудий инспекцияси раҳбари И.Бегасилов помидор жигарранг вируси аниқланиш ҳолати юзасидан импорт бўлган 43 тонна помидор маҳсулотида, айнан, Ўзбекистондан юкланган помидор маҳсулотида хавфли вирус қайд этилмаганини телефон мулоқотида тасдиқлади.
Вазирликнинг қайд этишича, жаҳон бозорига хавфсиз, текширилган ва турли касалликлардан ҳоли маҳсулотларни чиқариш, халқаро қишлоқ хўжалиги майдонида Ўзбекистон бренди нуфузини мустаҳкамлаш мақсадида ҳар бир қишлоқ хўжалиги маҳсулоти партиясидан намуналар олиниб, Марказий фитосанитария лабораториясида экспертизадан ўтказилиб, лабораториянинг хулосасига кўра экспорт ва импорт жараёнлари амалга оширилади. Жумладан помидор жигарранг вирусини аниқлаш учун ҳам намуналар 8 соат давомида махсус полимераза занжир реакцияси (ПЗР) тестидан ўтказилади.
Изоҳ (0)