“2023 йилда бозор тамойилларига асосланган ипотека кредитлари орқали аҳолини уй-жой билан таъминлаш дастурини амалга ошириш чора-тадбирлари тўғрисида”ги Президент фармони қабул қилинди. Бу ҳақда Telegram’даги “Ҳуқуқий ахборот” канали хабар берди.
Фармонга кўра, 2023 йил 1 майдан 2025 йил 1 январгача айрим қурилиш материаллари ва хом ашё турларини импорт қилишда божхона божининг нол ставкаси қўлланилади.
5 апрель куни Шавкат Мирзиёев раислигида ўтказилган йиғилишда аҳолини арзон уй-жой билан таъминлаш учун қурилиш таннархини пасайтириш зарурлиги таъкидланганди. Хабарга кўра, пудрат ташкилотларига қурилаётган уйни қаватма-қават гаровга қўйиш ва ҳар бир қавати учун кредит олиш ҳуқуқи берилади. Банклар берадиган кредитларни давлат томонидан қайта молиялаш амалиёти давом эттирилади.
Бундан ташқари, қурувчиларга кафиллик ва компенсация тўлаш тартиби такомиллаштирилади. Аҳолига ўз уйини энергия тежамкор материаллардан фойдаланиб таъмирлашига 10 йилга 16,5 фоиздан 80 миллион сўмгача кредит беришга қарор қилинди.
“Янги Ўзбекистон” ва бошқа давлат дастурлари доирасида қурилган массивларнинг бўш ерларида кўп қаватли уй-жойлар қуришни давом эттириш ва 2023 йилда қуриш ҳажмини 90 мингтага етказиш таклиф этилмоқда. 1 майдан бошлаб расмий даромади етарли бўлмаган аҳолига ҳам ипотека кредити олиш имкони яратилиши ҳақида хабар берилган эди. Президентнинг 13 апрелдаги мазкур қарори билан Эндиликда банкларга ипотека кредитларини расмий даромадга эга бўлмаган жисмоний шахсларга ҳам ажратишга рухсат этилди. Бунда, ушбу фуқароларнинг тўлов қобилияти уларнинг банк картасидаги айланмаси, ижара, коммунал ва бошқа харажатларини ҳисобга олган ҳолда аниқланади.
Изоҳ (0)